തിരുവനന്തപുരം: മാലിന്യമുക്തം നവകേരളം ക്യാമ്പയിന്റെ ഭാഗമായി ആദ്യഘട്ടത്തിൽ തിരുവനന്തപുരം സെൻട്രൽ, കാട്ടാക്കട കെ.എസ്.ആർ.ടി.സി ബസ് സ്റ്റേഷനുകൾ ഹരിത സ്റ്റേഷനുകളായി മാറും. തുടർന്ന് 18 ചെറിയ ഡിപ്പോകളും ഹരിത സ്റ്റേഷനാക്കും. ആര്യനാട്, വെള്ളനാട്, ആറ്റിങ്ങൽ, കണിയാപുരം, കിളിമാനൂർ, വെഞ്ഞാറമൂട്,നെടുമങ്ങാട്, പാലോട്, വിതുര, നെയ്യാറ്റിൻകര, വെള്ളറട, പാപ്പനംകോട്, പാറശാല, പേരൂർക്കട, തിരുവനന്തപുരം സിറ്റി, വികാസ്ഭവൻ, പൂവാർ, വിഴിഞ്ഞം എന്നിവയാണ് ഹരിത ബസ് ഡിപ്പോകളാകാൻ ഒരുങ്ങുന്നത്.

ക്യാമ്പയിന്റെ ഭാഗമായി ബസ് സ്റ്റേഷനുകളിലെ ഖരദ്രവ മാലിന്യ സംസ്‌കരണത്തിനുള്ള അടിസ്ഥാന സൗകര്യങ്ങൾ മെച്ചപ്പെടുത്തും. പ്ലാന്റുകൾ സ്ഥാപിക്കും. ബോധവത്കരണം നൽകും. ശേഖരിക്കുന്ന മാലിന്യം കൃത്യമായി ഹരിതകർമ്മ സേനയ്ക്ക് കൈമാറും. തദ്ദേശസ്ഥാപനങ്ങളുടെ നേതൃത്വത്തിലാകും അടിസ്ഥാന സൗകര്യങ്ങൾ ഒരുക്കുക.