തിരുവനന്തപുരം: മയക്കുമരുന്ന്‌ ഉപയോഗിച്ചശേഷം കറങ്ങി നടക്കുന്നവരെ കുടുക്കാൻ ‘ഡ്രഗ്‌സ്‌ ടെസ്റ്റിംഗ്‌’ കിറ്റ് ഉപയോഗിച്ചുള്ള പൊലീസ്‌ പരിശോധനയിൽ ഒരാൾ കുടുങ്ങി.കോർപറേഷൻ സ്മാർട്ട് സിറ്റി പദ്ധതിയുടെ ഭാഗമായി തിരുവനന്തപുരം സിറ്റി പൊലീസിന്‌ കൈമാറിയ ആധുനിക മെഷീൻ ‘ഓറൽ ഫ്ലൂയിഡ്‌ മൊബൈൽ ടെസ്റ്റ്‌ സിസ്റ്റം’ ആണ്‌ കഞ്ചാവ്‌ ഉപയോഗിച്ചയാളെ കുടുക്കിയത്‌. മ്യൂസിയം പൊലീസാണ്‌ മാനവീയം വീഥിയിൽ പരിശോധന നടത്തിയത്‌. സംശയം തോന്നിയ നാലുപേരിലാണ്‌ പരിശോധന നടത്തിയത്‌. ഇതിൽ ഒരാൾ കഞ്ചാവ്‌ ഉപയോഗിച്ചതായി കണ്ടെത്തുകയായിരുന്നു. ഇയാളെ കസ്റ്റഡിയിലെടുത്തു. എം.ഡി.എം.എ ഉപയോഗമടക്കം കണ്ടെത്താൻ കഴിയുന്ന അത്യാധുനിക ഉപകരണമാണ്‌ ഓറൽ ഫ്ലൂയിഡ്‌ മൊബൈൽ ടെസ്റ്റ്‌ സിസ്റ്റം.
ആറിനം ലഹരി വസ്‌തുക്കളുടെ സാന്നിദ്ധ്യം നിർണയിക്കാനാകും.കാട്രിഡ്‌ജിൽ ശേഖരിച്ച ഉമിനീർ ഉപകരണത്തിൽവച്ച് പരിശോധിച്ചാൽ അഞ്ച് മിനിറ്റിൽ ഫലം ലഭിക്കും.പൊതുഇടങ്ങളിൽ ജനങ്ങളുടെ സുരക്ഷ ഉറപ്പാക്കുന്നതിന്‌ സ്മാർട്ട് സിറ്റി പദ്ധതിയിൽ ഉൾപ്പെടുത്തി വാങ്ങിയ ഇലക്‌ട്രിക്‌ ഹോവർ വാഹനങ്ങളിൽ മാനവീയത്തിൽ പൊലീസ്‌ പട്രോളിംഗും ആരംഭിച്ചു.