മാന്നാർ: വഴിയിൽ നിന്ന് വീണുകിട്ടിയ സ്വർണാഭരണം ഉടമസ്ഥന് തിരികെ നൽകി ഓട്ടോ ഡ്രൈവർ മാതൃകയായി. മാന്നാർ തൃക്കുരട്ടി ജംഗ്ഷൻ സ്റ്റാൻഡിലെ ഓട്ടോ ഡ്രൈവർ കുരട്ടിക്കാട് മേടയിൽ മുഹമ്മദ് സിയാദാണ് വഴിയിൽ നിന്ന് വീണു കിട്ടിയ നാലു ഗ്രാം തൂക്കം വരുന്ന സ്വർണ ചെയിൻ ഉടമസ്ഥനെ കണ്ടെത്തി തിരികെ ഏല്പിച്ചത്. ഞായറാഴ്ച രാവിലെ മകനെ മദ്രസയിൽ കൊണ്ട് വിടാൻ ഓട്ടോയിൽ പോകുമ്പോഴാണ് വഴിയരികിൽ കിടന്ന സ്വർണച്ചെയിൻ സിയാദിന്റെ ശ്രദ്ധയിൽപെട്ടത്. സിയാദ് സാമൂഹ്യ പ്രവർത്തകൻ സജി കുട്ടപ്പനെ അറിയിച്ച് സാമൂഹ്യ മാദ്ധ്യമങ്ങളിലൂടെ പരസ്യപ്പെടുത്തുകയുമായിരുന്നു. ഇതറിഞ്ഞ ഉടമസ്ഥൻ തടിയൂർ സ്വദേശി അനൂപ്കുമാർ സിയാദിനെ ബന്ധപ്പെടുകയും ഇന്നലെ മാന്നാറിലെത്തി സ്വർണം കൈപ്പറ്റുകയും ചെയ്തു. മാവേലിക്കര ബ്ലോക്ക് പഞ്ചായത്ത് മെമ്പറും മാന്നാർ മർച്ചന്റ്സ് അസോസിയേഷൻ പ്രസിഡന്റുമായ അനിൽ എസ്.അമ്പിളി, തൃക്കുരട്ടി മഹാദേവ സേവാ സമിതി പ്രസിഡന്റ് കലാധരൻ കൈലാസം സമിതി അംഗം അനിരുദ്ധൻ എന്നിവരുടെ സാന്നിധ്യത്തിൽ സജി കുട്ടപ്പന്റെ ഉടമസ്ഥതയിലുള്ള ദേവീവെസൽസിൽ വച്ച് സ്വർണച്ചെയിൻ സിയാദ് ഉടമസ്ഥന് കൈമാറി.