ആലപ്പുഴ: തദ്ദേശസ്ഥാപനങ്ങൾക്ക് പ്രാദേശികജനതയെ ഉയർത്തിക്കൊണ്ടുവരാൻ വലിയ ഇടപെടലുകൾ നടത്താനാവുമെന്ന് കൃഷി മന്ത്രി പി.പ്രസാദ് പറഞ്ഞു. ജില്ലാ പഞ്ചായത്ത് 'സ്‌പോർട്‌സാണ് ലഹരി' പദ്ധതിയുടെ ഭാഗമായി ആര്യാട് ഡിവിഷനിൽ ആരംഭിച്ച കനോയിംഗ്-കയാക്കിംഗ് പരിശീലനത്തിനായി വാങ്ങിയ ബോട്ടുകളുടെ ഉദ്ഘാടനം അടിവാരം കിഴക്ക് കായൽച്ചിറയിൽ നിർവഹിച്ചു സംസാരിക്കുകയായിരുന്നു അദ്ദേഹം. കനോയിംഗ്-കയാക്കിംഗ് രംഗത്ത് ലോകചാമ്പ്യന്മാരെ വാർത്തെടുക്കുക എന്ന ലക്ഷ്യത്തോടെയാണ് കാൽ കോടിയോളം രൂപ മുടക്കി ജില്ലാ പഞ്ചായത്ത് പരിശീലനത്തിന് ആവശ്യമായത്ര ബോട്ടുകൾ വാങ്ങിയത്. വിവിധ മത്സരങ്ങളിൽ വിജയിച്ച കായികതാരങ്ങളെ ചടങ്ങിൽ മന്ത്രി ആദരിച്ചു. കലവൂർ ഗവ ഹയർസെക്കൻഡറി സ്‌കൂൾ, മണ്ണഞ്ചേരി ഗവ ഹൈസ്‌കൂൾ എന്നിവിടങ്ങളിലെ വിദ്യാർത്ഥികളാണ് കനോയിംഗ്-കയാക്കിംഗ് അസോസിയേഷന്റെ കീഴിൽ ഇവിടെ പരിശീലനം നേടുന്നത്.
ഉദ്ഘാടന ചടങ്ങിൽ ജില്ലാ പഞ്ചായത്ത് പ്രസിഡന്റ് കെ.ജി.രാജേശ്വരി അദ്ധ്യക്ഷത വഹിച്ചു. ആര്യാട് ബ്ലോക്ക് പഞ്ചായത്ത് പ്രസിഡന്റ് കെ.ഡി.മഹീന്ദ്രൻ ജഴ്‌സി കൈമാറി. ഗ്രാമപഞ്ചായത്ത് പ്രസിഡന്റ് ടി.വി.അജിത് കുമാർ മുഖ്യാതിഥിയായി. ജില്ലാ പഞ്ചായത്ത് അംഗം അഡ്വ.ആർ.റിയാസ്, ഗ്രാമപഞ്ചായത്ത് വൈസ് പ്രസിഡന്റ് പി.എ. ജുമൈലത്ത്, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപെഴ്സൺ സുയമോൾ, വികസനകാര്യ സ്റ്റാൻഡിംഗ് കമ്മിറ്റി ചെയർമാൻ എം.എസ്.സന്തോഷ്, ആരോഗ്യവിഭ്യാഭ്യാസ സ്റ്റാൻഡിംഗ് കമ്മിറ്റി ചെയർപെഴ്സൺ ഉദയമ്മ, ഗ്രാമപഞ്ചായത്ത് അംഗങ്ങളായ ദീപ സുരേഷ്, ബഷീർ മാക്കിനിക്കാട്, നവാസ് നൈന, മണ്ണഞ്ചേരി ജി.എച്ച്.എസ് പ്രധാനാദ്ധ്യാപിക കെ.ഹഫ്സ, കെ.എം.റെജി, പി.ജോഷി മോൻ, സി.എച്ച്.റഷീദ്, മുഹമ്മദ് മുസ്തഫ, വി.വി.മോഹൻദാസ്, കെ.എം.ഷിബു തുടങ്ങിയവർ പങ്കെടുത്തു.