ഹരിപ്പാട്: മൂന്ന് കുട്ടികൾ ഉൾപ്പടെ ആറു പേർക്ക് തെരുവ് നായയുടെ കടിയേറ്റു. മുതുകുളം തെക്ക് രശ്മി ഭവനത്തിൽ പദ്മിനി (60), ചൈതന്യയിൽ സുനു (36), ശ്രീനിലയത്തിൽ വിശ്വനാഥൻ (71), സൂര്യനാരായണൻ (11), അരുന്ധതി (4), ആദിലക്ഷ്മി (5) എന്നിവർക്കാണ് കടിയേറ്റത്. എല്ലാവരും ആലപ്പുഴ മെഡിക്കൽ കോളേജ് ആശുപത്രിയിൽ ചികിത്സ തേടി. ഇവരിൽ പലർക്കും ആഴത്തിലുളള മുറിവേറ്റിട്ടുണ്ട്. വാരണപ്പളളി പടിഞ്ഞാറ്, മായിക്കൽ, ആലുംമൂട്ടിൽച്ചിറ ഭാഗങ്ങളിലാണ് നായ്കൾ ഓടി നടന്ന് ആക്രമണം നടത്തിയത്. ഇവയ്ക്ക് പേ വിഷബാധയേറ്റിരിക്കാമെന്ന് സംശയമുണ്ട്. അക്രമണകാരിയായ നായ സമീപ പ്രദേശങ്ങളിലെ ഉൾപ്പെടെ മറ്റു തെരുവുനായ്ക്കളെയും കടിച്ചു.