ആലപ്പുഴ: വേമ്പനാട് കായൽ പുനരുജ്ജീവനത്തിനും സംരക്ഷണത്തിനുമായി ജില്ലാ ഭരണകൂടത്തിന്റെ നേതൃത്വത്തിൽ സംഘടിപ്പിച്ചുവരുന്ന പ്രവർത്തനങ്ങളുടെ തുടർച്ചയായി ജനുവരിയിൽ പ്ലാസ്റ്റിക് മുക്ത വേമ്പനാട് ക്യാമ്പയിൻ സംഘടിപ്പിക്കും. ആദ്യഘട്ടത്തിൽ 10 ഹോട്ട് സ്‌പോട്ടുകൾ കണ്ടെത്തിയാണ് മെഗാ പ്ലാസ്റ്റിക് ക്ലീനിംഗ് ഡ്രൈവ് സംഘടിപ്പിക്കുക. ഡ്രൈവിൽ തദ്ദേശസ്വയംഭരണ സ്ഥാപനങ്ങൾ, മത്സ്യത്തൊഴിലാളികൾ, സന്നദ്ധസംഘടനകൾ, ഹരിതകേരളം മിഷൻ, കുടുംബശ്രീ, ഹരിതകർമ്മ സേന, വിമുക്തഭടന്മാർ, പരിസ്ഥിതിപ്രവർത്തകർ, വിദ്യാർത്ഥികൾ തുടങ്ങിയവരെ പങ്കെടുപ്പിച്ചാണ് ക്യാമ്പയിൻ.വേമ്പനാട് കായൽ പുനരുജ്ജീവനത്തിന്റെയും സംരക്ഷണപ്രവർത്തനങ്ങളുടെയും ഭാഗമായി പ്ലാസ്റ്റിക് ക്ലീനിംഗ് ഡ്രൈവിന് പുറമേ, ബയോഷീൽഡ് ഒരുക്കൽ, വേമ്പനാട് കായൽ ഇന്റർപ്രെട്ടേഷൻ സെന്റർ, യാൺ മ്യൂസിയം, ബോട്ടിൽ ബൂത്തുകൾ, കമ്യൂണിറ്റി ടൂറിസം, മത്സ്യ വിത്തുകൾ നിക്ഷേപിക്കൽ തുടങ്ങിയ ഒട്ടേറെ പദ്ധതികളും ആസൂത്രണം ചെയ്തു. ക്യാമ്പയിൻ പ്രവർത്തനങ്ങൾ ഏകോപിപ്പിക്കുന്നതിനും ക്ലീനിംഗ് ഡ്രൈവ് വിജയിപ്പിക്കുന്നതിനും വിവിധ തലങ്ങളിൽ ഉടൻ യോഗങ്ങൾ ചേരും. ഇതുമായി ബന്ധപ്പെട്ട് കളക്ടർ അലക്‌സ് വർഗീസിന്റെ നേതൃത്വത്തിൽ നടന്ന പ്രാഥമിക യോഗത്തിൽ എച്ച്.സലാം എം.എൽ.എ, ജില്ലാപഞ്ചായത്ത് വികസന സ്റ്റാൻഡിംഗ് കമ്മിറ്റി ചെയർപെഴ്‌സൺ ബിനു ഐസക് രാജു, എ.ഡി.എം ആശ സി .എബ്രഹാം, അന്താരാഷ്ട്ര കായൽ ഗവേഷണകേന്ദ്രം ഡയറക്ടർ ഡോ. കെ.ജി.പദ്മകുമാർ, ഡെപ്യൂട്ടി കളക്ടർമാരായ സി.പ്രേംജി, ജോളി ജോസഫ്, കുഫോസിലെ ഡോ. സഞ്ജീവൻ, എസ് ഡി കോളേജിലെ പ്രൊഫ. ഡോ. ജി.എൻ.പ്രഭു, തദ്ദേശസ്ഥാപന പ്രതിനിധികൾ, വിവിധ വകുപ്പുകളിലെ ഉദ്യോഗസ്ഥർ പങ്കെടുത്തു.

.......

# ആദ്യഘട്ടത്തിൽ 10 ഹോട്ട് സ്‌പോട്ടുകൾ

ക്യാമ്പയിന്റെ ഭാഗമായി ജനുവരി മാസത്തിൽ മെഗാ പ്ലാസ്റ്റിക് മുക്ത ഡ്രൈവ്

വേമ്പനാട് കായൽ മേഖലയിലെ മുഴുവൻ തദ്ദേശസ്ഥാപനങ്ങളിലും ക്ലീനിംഗ് ഡ്രൈവ്

 കായലിലെ പോളപ്പായലിൽ നിന്ന് മൂല്യവർദ്ധിത ഉത്പന്നങ്ങൾ നിർമ്മിക്കും

മത്സ്യത്തൊഴിലാളികൾ, ഹൗസ്‌ബോട്ട് ജീവനക്കാർ, തീരത്ത് താമസിക്കുന്നവർക്ക് ബോധവത്കരണം