പിറവം: മൂവാറ്റുപുഴ ആറിനെ നാശത്തിലേക്ക് എത്തിക്കുന്ന മീനച്ചിൽ പദ്ധതി നടപ്പാക്കരുതെന്ന് കേരള കോൺഗ്രസ് (ജേക്കബ്) നിയോജക മണ്ഡലം യോഗം പ്രമേയത്തിലൂടെ സർക്കാരിനോട് ആവശ്യപ്പെട്ടു. പദ്ധതി നടപ്പാക്കിയാൽ മുവാറ്റുപുഴയാറിലെ ശുദ്ധ ജല, ജലസേചന പദ്ധതികൾ എല്ലാം അവതാളത്തിൽ ആകുമെന്ന് യോഗം ചൂണ്ടിക്കാട്ടി. പദ്ധതിക്കെതിരെ ഈ മാസം 14ന് വൈകിട്ട് ജനകീയ പങ്കാളിത്തത്തോടെ പ്രതിഷേധ സദസ് സംഘടിപ്പിക്കും. പാർട്ടി ലീഡർ അനൂപ് ജേക്കബ് എം.എൽ.എ സദസ് ഉദ്ഘാടനം ചെയ്യും. നിയോജക മണ്ഡലം പ്രസിഡന്റ് സുനിൽ ഇടപ്പലക്കാട്ട് അദ്ധ്യക്ഷനാകും. സെക്രട്ടറി രാജു പാണാലിക്കൽ, ജില്ല പ്രസിഡന്റ് ഇ.എം. മൈക്കിൾ, സംസ്ഥാന സെക്രട്ടറി റെജി ജോർജ്, തമ്പി ഇലവുംപറമ്പിൽ, ടി.കെ. അലക്സാണ്ടർ, ജോഷി കെ. പോൾ, രാജു തുരുത്തേൽ, ജോയി പ്ലാത്തോട്ടം, തോമസ് തേക്കുമ്മൂട്ടിൽ, രാധ നാരായണൻ, കുഞ്ഞുമോൻ ഫിലിപ്പ്, ബീനാ ബാബു, ജനപ്രതിനിധികൾ തുടങ്ങിയവർ സംസാരിക്കും.