മൂവാറ്റുപുഴ: സി.പി.എം മൂവാറ്റുപുഴ ഏരിയാ സമ്മേളനത്തിന് തുടക്കം കുറിച്ച് കോടിയേരി ബാലകൃഷ്ണൻ നഗറിലെ

(മൂവാറ്റുപുഴ മേള ഓഡിറ്റോറിയം) രക്തസാക്ഷിമണ്ഡപത്തിൽ ഏരിയാ കമ്മിറ്റി അംഗം ടി.എൻ. മോഹൻ പതാക ഉയർത്തി. പ്രതിനിധി സമ്മേളനം സംസ്ഥാന കമ്മിറ്റി അംഗം എസ്. സതീഷ് ഉദ്ഘാടനം ചെയ്‌തു. ഏരിയ കമ്മിറ്റി അംഗം സജി ജോർജ് അദ്ധ്യക്ഷനായി. എം.ആർ. പ്രഭാകരൻ രക്തസാക്ഷി പ്രമേയവും കെ.ടി. രാജൻ അനുശോചന പ്രമേയവും അവതരിപ്പിച്ചു. എം.എ. സഹീർ സ്വാഗതം പറഞ്ഞു സജി ജോർജ് (കൺവീനർ) വി.ആർ. ശാലിനി, വി.കെ. ഉമ്മർ, ബിനോയ് ഭാസ്കരൻ എന്നിവരടങ്ങുന്ന പ്രസീഡിയമാണ് സമ്മേളനം നിയന്ത്രിക്കുന്നത്.

ഏരിയ സെക്രട്ടറി കെ.പി. രാമചന്ദ്രൻ അവതരിപ്പിച്ച പ്രവർത്തന റിപ്പോർട്ടിന്മേലുള്ള ചർച്ച ആരംഭിച്ചു. ജില്ലാ സെക്രട്ടറി സി.എൻ. മോഹനൻ, സംസ്ഥാന കമ്മിറ്റി അംഗം ഗോപി കോട്ടമുറിക്കൽ, ജില്ല സെക്രട്ടറിയറ്റ് അംഗങ്ങളായ പി.ആർ. മുരളീധരൻ, ആർ. അനിൽകുമാർ എന്നിവർ പങ്കെടുക്കുന്നു. ഇന്ന് രാവിലെ 10ന് പൊതുചർച്ചക്കുള്ള മറുപടിക്ക് ശേഷം ഏരിയ കമ്മിറ്റി അംഗങ്ങളെയും സെക്രട്ടറിയെയും ജില്ലാ സമ്മേളന പ്രതിനിധികളെയും തിരഞ്ഞെടുക്കും. നാളെ വൈകിട്ട് നാലിന് മൂവാറ്റുപുഴ നഗരത്തിൽ ചുവപ്പുസേനാ മാർച്ചിനും റാലിക്കും ശേഷം സീതാറാം യെച്ചൂരി നഗറിൽ (മുനിസിപ്പൽ ടൗൺഹാൾ ഗ്രൗണ്ട്) ചേരുന്ന പൊതുസമ്മേളനം സംസ്ഥാന സെക്രട്ടറിയറ്റ് അംഗം പി.എ. മുഹമ്മദ് റിയാസ് ഉദ്ഘാടനം ചെയ്യും. തുടർന്ന് മൂവാറ്റുപുഴ എയ്ഞ്ചൽ വോയ്‌സിന്റെ ഗാനമേള നടക്കും.