കൊച്ചി: ഹൈക്കോടതി ജഡ്ജി ജസ്റ്റിസ് ദേവൻ രാമചന്ദ്രനെതിരായ സൈബർ ആക്രമണത്തിൽ കൊച്ചി സൈബർ പൊലീസ് കേസെടുത്തു. അഭിഭാഷകനും പൊതുപ്രവർത്തകനുമായ അഡ്വ. കുളത്തൂർ ജയ്‌സിംഗ് നൽകിയ പരാതിയിലാണ് നടപടി. അപകീർത്തിപ്പെടുത്തൽ, കലാപത്തിനുള്ള ശ്രമം തുടങ്ങിയ വകുപ്പുകളാണ് ചുമത്തിയിരിക്കുന്നത്. പൊതുസ്ഥലത്തെ അനധികൃത ഫ്ളക്സ് ബോർഡുകളും കൊടിതോരണങ്ങളും നീക്കം ചെയ്യണമെന്ന ഹൈക്കോടതി നിർദ്ദേശം പാലിക്കാത്ത ഉദ്യോഗസ്ഥർക്കെതിരെ പിഴ ചുമത്തുന്നത് ഉൾപ്പെടെ കടുത്ത നടപടിയുണ്ടാകുമെന്ന് ഉത്തരവിട്ടതിന് പിന്നാലെയായിരുന്നു സൈബർ ആക്രമണം. സൈബർ ക്രൈം അസി. കമ്മിഷണർ എം.കെ.മുരളിയുടെ നേതൃത്വത്തിലുള്ള സംഘമാണ് കേസന്വേഷിക്കുന്നത്.