കട്ടപ്പന: കട്ടപ്പനയിൽ നടന്ന റെയിൻ ഇന്റർനാഷണൽ നേച്ചർ ഫിലിം ഫെസ്റ്റിവലിൽ കൗതുക കാഴ്ച്ച ഒരുക്കുകയാണ് ഒരു സ്റ്റാൾ . 1800 കാലഘട്ടം മുതലുള്ള വിവിധ ക്യാമറകളുടെ നീണ്ട നിരയാണ് ആളുകളെ ഇവിടേക്ക് ആകർഷിക്കുന്നത്.കോട്ടയം ആസ്ഥാനമായി പ്രവർത്തിക്കുന്ന എലിക്സിയർ സ്‌കൂൾ ഓഫ് ഫോട്ടോഗ്രാഫി മേധാവി എം .മനു 15 വർഷം കൊണ്ട് ശേഖരിച്ച ക്യാമറകളുടെ നീണ്ട നിരയാണ് എക്സിബിഷനിൽ ഒരുക്കിയിരുന്നത്. മറ്റ് എക്സിബിഷനുകളെ അപേക്ഷിച്ച് കൂടുതൽ കൗതുകവും ആകർഷണീയവുമായിരുന്നു പഴയ ക്യാമറകളുടെ നീണ്ട നിര. വിവിധ ഇടങ്ങളിൽ യാത്ര ചെയ്ത് പലരെയും കണ്ടുമുട്ടി 15 വർഷം കൊണ്ടാണ് 400 ക്യാമറകൾ മനു ശേഖരിച്ചത്.അഞ്ച് വർഷമായി വിവിധയിടങ്ങളിൽ എക്സിബിഷനുകൾ നടത്തിവരുന്നു.
1800കളുടെ അവസാനം ഇറങ്ങിയ ക്യാമറകൾ മുതൽ,ഫിലിം ക്യാമറകൾ നിർത്തലാക്കുന്ന 2005 വരെയുള്ള കാലഘട്ടത്തിലെ ക്യാമറകൾ കളക്ഷനിൽ ഉണ്ട്.
1887ലെ ക്യാമറയാണ് ഏറ്റവും പഴയ എന്നതിൽ സ്ഥാനം പിടിച്ചിരിക്കുന്നത്.ഇൻസ്റ്റന്റ് ക്യാമറ, വീഡിയോ ക്യാമറ, ടി എൽ ആർ ക്യാമറ, എസ് എൽ ആർ ക്യാമറ , തുടങ്ങി നിരവധി ഇനങ്ങൾ ഉണ്ട്. ക്യാമറ കൂടാതെ പ്രൊജക്ടർ, വിവിധ തരം ഫിലിമുകൾ എല്ലാം പ്രദർശനത്തിൽ ഇടംപിടിച്ചു.