കട്ടപ്പന: കട്ടപ്പനയിൽ നടന്ന റെയിൻ ഇന്റർനാഷണൽ നേച്ചർ ഫിലിം ഫെസ്റ്റിവൽ സമാപിച്ചു. മികച്ച ഹ്രസ്വചിത്രം(കോളേജ്) എലിസിയം, മികച്ച ഹ്രസ്വചിത്രം (സ്‌കൂൾ) ഇവിടം, മികച്ച ഡോക്യുമെന്ററി(കോളേജ്) രാച്ചമ്മ, മികച്ച ഡോക്യുമെന്ററി(സ്‌കൂൾ) ദെയർ സ്റ്റോറി എന്നിവയ്ക്കും പ്രത്യേക പരാമർശം ഹ്രസ്വചിത്രം (കോളേജ്) കാടത്തി, ഹ്രസ്വചിത്രം (സ്‌കൂൾ) അൺപ്ലഗ്ഡ് ദി സൗത്ത് ഓഫ് സൈലൻസ്, ഡോക്യുമെന്ററി (കോളേജ്) യൂസ് മി വൈസ് ലി എന്നിവയ്ക്കും പുരസ്‌കാരങ്ങൾ സമ്മാനിച്ചു. സമാപന യോഗം കളക്ടർ വി. വിഗ്‌നേശ്വരി ഉദ്ഘാടനം ചെയ്തു. സംവിധായകൻ ജയരാജ്, സംഗീത സംവിധായകനും ഗായകനുമായ ജാസി ഗിഫ്റ്റ്, സംവിധായകൻ പ്രദീപ് എം നായർ തുടങ്ങിയവർ സംസാരിച്ചു. ഫീച്ചർ, ഡോക്യുമെന്ററി, ഷോർട്ട്ഫിലിം എന്നീ വിഭാഗങ്ങളിലായി 20 രാജ്യങ്ങളിൽ നിന്നുള്ള പരിസ്ഥിതി പ്രമേയമായുള്ള 70 സിനിമകളാണ് പ്രദർശിപ്പിച്ചത്.