തൊടുപുഴ: വികസിത ഭാരത ആശയങ്ങൾ പ്രധാനമന്ത്രിയ്ക്ക് മുമ്പാകെ അവതരിപ്പിക്കാൻ യുവജനങ്ങൾക്ക് അവസരം നൽകുന്ന വികസിത ഭാരത് യംഗ് ലീഡേഴ്സ് ഡയലോഗിലേയ്ക്ക് 10 വരെ അപേക്ഷിക്കാം. ദേശീയ യുവജനോത്സവത്തിന്റെ ഭാഗമായി ജനുവരി 11, 12 തീയതികളിൽ ന്യൂഡൽഹിയിലെ ഭാരത് മണ്ഡപത്തിലാണ് മത്സരങ്ങളിലൂടെ തിരഞ്ഞെടുക്കുന്ന യുവജനങ്ങളുമായി പ്രധാനമന്ത്രി വികസനസങ്കല്പങ്ങൾ ചർച്ച ചെയ്യുക. മേരാ യുവ ഭാരത് പ്ലാറ്റ്‌ഫോമിൽ സംഘടിപ്പിക്കുന്ന ക്വിസ് പരിപാടിയിലൂടെ മത്സരത്തിന്റെ ഒന്നാം ഘട്ടം തുടങ്ങും. ഇതിൽ വിജയികളാകുന്നവർക്ക് തുടർന്ന് ബ്ളോഗ് ഉപന്യാസമത്സരങ്ങളും കഴിഞ്ഞാണ് സംസ്ഥാനതല യംഗ് ലീഡേഴ്സിലെ വിജയികളെ കണ്ടെത്തുക. വിജയികൾക്ക് 1,00,000, 75,000, 50,000 രൂപ ക്രമത്തിൽ ഒന്നും രണ്ടും മൂന്നും സമ്മാനങ്ങൾ, സർട്ടിഫിക്കറ്റ് എന്നിവ ലഭിക്കും. 300 പ്രോത്സാഹനസമ്മാനങ്ങളും ഉണ്ട്. മത്സരങ്ങൾ സംബന്ധിച്ച വിശദാംശങ്ങൾ http://mybharat.gov.in എന്ന പോർട്ടലിലും നെഹ്റു യുവ കേന്ദ്ര, നാഷണൽ സർവീസ് സ്‌കീം ഓഫീസുകളിലും ലഭ്യമാണ്.