ഇടുക്കി: പൊതുജനങ്ങളുടെ പരാതികൾ പരിഹരിക്കുന്നതിനായി മന്ത്രിമാരുടെ നേതൃത്വത്തിൽ ജില്ലയിലെ താലൂക്ക് തല അദാലത്തുകൾ ഈ മാസം മൂന്നാംവാരത്തിൽ നടക്കും. എല്ലാ താലൂക്കിലും മന്ത്രിമാർ നേരിട്ടെത്തി ജനങ്ങളുടെ പരാതികൾ സ്വീകരിക്കും. പരിഹരിക്കാൻ കഴിയുന്ന പരാതികൾ തൽസമയം തീർപ്പാക്കുകയുമാണ് അദാലത്തിന്റെ ലക്ഷ്യം. karuthal.kerala.gov.in എന്ന വെബ്സൈറ്റ് മുഖേന പരാതികൾ നൽകണം. സൈറ്റ് വഴി സ്വന്തമായോ അക്ഷയ സെന്റർ വഴിയോ താലൂക്ക് ഓഫീസിലെ ഹെൽപ്പ് ഡെസ്‌ക് വഴിയോ പരാതികൾ നൽകാം. അദാലത്ത് നടക്കുന്ന സ്ഥലങ്ങളിൽ ഒരുക്കിയ ഹെൽപ്പ് ഡെസ്‌കുകൾ വഴിയും പരാതികൾ നൽകാം. പോർട്ടൽ വഴി ലഭിക്കുന്ന പരാതികൾ ജില്ലാ കളക്ട്രേറ്റുകളിൽ നിന്ന് ബന്ധപ്പെട്ട വകുപ്പിലേക്ക് അതേ പോർട്ടൽ വഴി അയച്ച് നൽകും. പരാതികൾ പരിശോധിച്ച് വകുപ്പുകൾ നടപടി സ്വീകരിച്ച് ബന്ധപ്പെട്ട രേഖകൾ സഹിതം അതേ പോർട്ടൽ വഴി തിരികെ നൽകും. പൊതുജനങ്ങളുടെ പരാതികൾ പരിഹരിക്കുന്നതിന് സർക്കാർ വലിയ പ്രാധാന്യമാണ് നൽകുന്നത്. ഇതിന്റെ ഭാഗമായി വിവിധ തലങ്ങളിൽ പല ഘട്ടങ്ങളിൽ അദാലത്തുകൾ സംഘടിപ്പിച്ചു. മന്ത്രിസഭയുടെ രണ്ടാം വാർഷികത്തോടനുബന്ധിച്ച് ഏപ്രിൽ- മേയ് മാസങ്ങളിൽ താലൂക്ക് ആസ്ഥാനങ്ങളിൽ 'കരുതലും കൈത്താങ്ങും" എന്ന പേരിൽ മന്ത്രിമാരുടെ നേതൃത്വത്തിൽ പരാതി പരിഹാര അദാലത്ത് നടത്തിയിരുന്നു. ഇതിന്റെ തുടർച്ചയായാണ് താലൂക്ക് അദാലത്ത്.

പരിഗണിക്കുന്ന വിഷയങ്ങൾ

1.ഭൂമി പോക്കുവരവ്, അതിർത്തി നിർണ്ണയം, അനധികൃത നിർമ്മാണം, ഭൂമി കൈയേറ്റം, അതിർത്തിത്തർക്കങ്ങളും വഴി തടസ്സപ്പെടുത്തലും

2. സർട്ടിഫിക്കറ്റുകൾ/ ലൈസൻസുകൾ നൽകുന്നതിലെ കാലതാമസം/ നിരസിക്കൽ

3. കെട്ടിട നിർമ്മാണ ചട്ടങ്ങളുമായി ബന്ധപ്പെട്ടവ

4. വയോജന സംരക്ഷണം

5. പട്ടികജാതിപട്ടികവർഗ വിഭാഗങ്ങൾക്കുള്ള ആനുകൂല്യങ്ങൾ

6. മത്സ്യബന്ധന തൊഴിലാളികളുമായി ബന്ധപ്പെട്ടവ

7. ശാരീരിക/ മാനസിക വെല്ലവിളി നേരിടുന്നവരുടെ ആവശ്യങ്ങൾ

8. പരിസ്ഥിതി മലിനീകരണം/ മാലിന്യ സംസ്‌കരണം

9. പൊതു ജലസ്രോതസ്സുകളുടെ സംരക്ഷണം,​ കുടിവെള്ളം

10. റേഷൻകാർഡ്

11. കാർഷിക മേഖലയുമായി ബന്ധപ്പെട്ട്

12. വളർത്തുമൃഗങ്ങൾക്കുള്ള നഷ്ടപരിഹാരം/ മറ്റ് വിഷയങ്ങൾ

13. ഭക്ഷ്യ സുരക്ഷയുമായി ബന്ധപ്പെട്ടവ

14. വ്യവസായ സംരംഭങ്ങൾക്കുള്ള അനുമതി

15. ആരോഗ്യമേഖലയിലെ സ്ഥാപനങ്ങളുമായി ബന്ധപ്പെട്ടവ

16. വന്യജീവി ആക്രമണങ്ങളിൽ നിന്നുള്ള സംരക്ഷണം/ നഷ്ടപരിഹാരം

17. സ്‌കോളർഷിപ്പുകൾ സംബന്ധിച്ച്

18. തണ്ണീർത്തട സംരക്ഷണം

19. അപകടകരങ്ങളായ മരങ്ങൾ മുറിച്ചുമാറ്റുന്നത്

20. എൻഡോസൾഫാൻ ദുരിതബാധിതരുടെ വിഷയങ്ങൾ

21. പ്രകൃതിദുരന്തങ്ങൾക്കുള്ള നഷ്ടപരിഹാരം

പരിഗണിക്കാത്ത വിഷയങ്ങൾ

1. നിർദ്ദേശങ്ങൾ, അഭിപ്രായങ്ങൾ

2. ലൈഫ് മിഷൻ

3. ജോലി ആവശ്യപ്പെട്ടുള്ളവ/ പി.എസ്.സി സംബന്ധമായ വിഷയങ്ങൾ

4. വായ്പ എഴുതി തള്ളൽ

5. പൊലീസ് കേസുകൾ

6. പട്ടയങ്ങൾ, തരംമാറ്റം

7. മുഖ്യമന്ത്രിയുടെ ദുരിതാശ്വാസനിധിയിൽ നിന്ന് സഹായത്തിനായുള്ള അപേക്ഷകൾ

8. ചികിത്സാ സഹായം ഉൾപ്പെടെയുള്ളവ

9. സർക്കാർ ജീവനക്കാര്യം

10. വായ്പ തിരിച്ചടവിനുള്ള സാവകാശവും ഇളവുകളും