കട്ടപ്പന: ബസിൽ കളഞ്ഞുകിട്ടിയ സ്വർണമാല ഉടമയ്ക്ക് നൽകി സ്വകാര്യ ബസ് ജീവനക്കാർ. കൽത്തൊട്ടി ഉറുമ്പിൽ ജിഷയുടെ ഒരു പവന്റെ മാലയാണ് തിരികെ നൽകിയത്. വെള്ളയാംകുടിയിൽ സി.എസ്.സി സെന്റർ നടത്തുന്ന ജിഷ കട്ടപ്പനയിൽ നിന്ന് ശനിയാഴ്ച രാവിലെ എൽദോസ് ബസിൽ യാത്ര ചെയ്യവെയാണ് മാല നഷ്ടപ്പെട്ടത്. സ്ഥാപനത്തിൽ എത്തിയശേഷമാണ് മാല നഷ്ടമായ വിവരമറിഞ്ഞത്. ഈ വിവരം കുട്ടിമാളു ബസിലെ കണ്ടക്ടർ ശ്രീജിത്ത് മുഖേന എൽദോസ് ബസിലെ കണ്ടക്ടർ ബിജു പൈലിയെ അറിയിക്കുകയും ചെയ്തു. മാല കണ്ടെത്തി കൈവശം സൂക്ഷിച്ച ഇദ്ദേഹം ബസ് തിരികെ കട്ടപ്പനയിൽ എത്തിയപ്പോൾ ഉടമസ്ഥയ്ക്ക് കൈമാറുകയായിരുന്നു.