ഡിസംബർ 19 ലെ അദാലത്ത് ജനുവരി ആറിലേക്കും ഡിസംബർ 24 ലെ അദാലത്ത് ഡിസംബർ 23 ലേക്കും മാറ്റി

ഇടുക്കി: പൊതുജനങ്ങളുടെ പരാതികൾ പരിഹരിക്കാൻ മന്ത്രിമാരുടെ നേതൃത്വത്തിൽ സംഘടിപ്പിക്കുന്ന 'കരുതലും കൈത്താങ്ങും' താലൂക്ക്തല അദാലത്ത് തിയതിയിൽ ജില്ലയിൽ മാറ്റംവരുത്തി .ഡിസംബർ 19 ന് നടക്കേണ്ടിയിരുന്ന തൊടുപുഴ താലൂക്ക് തല അദാലത്ത് ജനുവരി 6 നും ഡിസംബർ 24 ന് നടത്താനിരുന്ന ഇടുക്കി അദാലത്ത് ഡിസംബർ 23 ന് ഉച്ചയ്ക്കും നടത്തും. മന്ത്രിമാരായ റോഷി അഗസ്റ്റിന്റെയും വി. എൻ വാസവന്റെയും നേതൃത്വത്തിലാണ് അദാലത്തുകൾ നടത്തുക. 20 ന് ദേവികുളം, 21 ന് പീരുമേട്, 23 ന് രാവിലെ ഉടുമ്പഞ്ചോല, ഉച്ചക്ക് ശേഷം ഇടുക്കി, ജനുവരി 6 ന് തൊടുപുഴ എന്നിങ്ങനെയാണ് അദാലത്ത് ക്രമീകരിച്ചിരിക്കുന്നത്. പൊതുജനങ്ങൾക്ക് അക്ഷയ കേന്ദ്രങ്ങൾ വഴിയോ, ഓൺലൈൻ വഴി നേരിട്ടോ അദാലത്തിലേക്കുളള പരാതികളും അപേക്ഷകളും നൽകാം. karuthal.kerala.gov.in വഴി ഓൺലൈനായി അപേക്ഷ സ്വീകരിക്കും. പേര്, വിലാസം, മൊബൈൽ നമ്പർ, ജില്ല, താലൂക്ക് എന്നിവ പരാതിയിൽ ഉൾപ്പെടുത്തണം. നിശ്ചിതമേഖലയിലുള്ള പരാതികൾ മാത്രമാണ് സ്വീകരിക്കുക. കൂടാതെ അദാലത്ത് നടക്കുന്ന സ്ഥലങ്ങളിൽ ഒരുക്കിയ ഹെൽപ്പ് ഡെസ്‌ക് മുഖാന്തിരവും പരാതികൾ സമർപ്പിക്കാവുന്നതാണ്. പോർട്ടൽ വഴി ലഭിക്കുന്ന പരാതികൾ ജില്ലാ കളക്ട്രേറ്റുകളിൽ നിന്ന് ബന്ധപ്പെട്ട വകുപ്പിലേക്ക് അതേ പോർട്ടൽ വഴി അയച്ച് നൽകും. പരാതികൾ പരിശോധിച്ച് വകുപ്പുകൾ നടപടി സ്വീകരിച്ച് ബന്ധപ്പെട്ട രേഖകൾ സഹിതം അതേ പോർട്ടൽ വഴി തിരികെ നൽകും.