ഇടുക്കി: വട്ടവട മാതൃകാ ഗ്രാമം പദ്ധതി സംബന്ധിച്ച വിഷയങ്ങൾക്ക് പുറമെ പൊതു പ്രശ്നങ്ങൾ കൂടി സർക്കാറിന്റെ ശ്രദ്ധയിൽ പെടുത്തുമെന്ന് കേരള നിയമസഭയുടെ ലോക്കൽ ഫണ്ട് അക്കൗണ്ട്സ് സംബന്ധിച്ച സമിതി ചെയർമാൻ ടി പി രാമകൃഷ്ണൻ എം. എൽ .എ പറഞ്ഞു. വട്ടവട ഗ്രാമപഞ്ചായത്ത് കോൺഫറൻസ് ഹാളിൽ പഞ്ചായത്ത് ഭരണസമിതി അംഗങ്ങളുമായി സമിതി അംഗങ്ങൾ നടത്തിയ യോഗത്തിന് ശേഷം സംസാരിക്കുകയായിരുന്നു അദ്ദേഹം. വട്ടവടയിലെ റോഡ് വികസനം ത്വരിതപ്പെടുത്തണം, ടൂറിസം രംഗത്ത് ജനങ്ങളെക്കൂടി ഭാഗഭാക്കാക്കണം. മാതൃകാ ഗ്രാമപദ്ധതിക്ക് നീക്കി വച്ച സ്ഥലം എങ്ങിനെ ഉപയോഗപ്പെടുത്താം എന്നതിനെപ്പറ്റി വ്യക്തത വരുത്താൻ സർക്കാറിന് റിപ്പോർട്ട് നൽകും
108 പട്ടികജാതി കുടുംബങ്ങൾക്ക് വീട് വച്ച് നൽകുന്നതായിരുന്നു മാതൃകാ ഗ്രാമം പദ്ധതി. പല വിധ കാരണങ്ങളാൽ പദ്ധതി നടപ്പായില്ല. തുടർന്നാണ് ലോക്കൽ ഫണ്ട് അക്കൗണ്ട്സ് സമിതി അംഗങ്ങൾ വട്ടവടയിലെത്തി യോഗം വിളിച്ച് ചേർത്തത്. സമിതി അംഗങ്ങളും എം .എൽ. എമാരുമായ എ .സി മൊയ്തീൻ, ടി .ഐ മധുസൂദനൻ, എൽദോസ് പി .കുന്നപ്പിള്ളി, കെ .പി കുഞ്ഞഹമ്മദ് കുട്ടി മാസ്റ്റർ സ്ഥലം എം എൽ എ അഡ്വ. എ രാജ തുടങ്ങിയവർ പങ്കെടുത്തു. യോഗ ശേഷം സമിതി അംഗങ്ങൾ പദ്ധതി പ്രദേശം സന്ദർശിച്ചു