ഇടുക്കി: ഭരണഘടനാ ശിൽപ്പി ഡോ. ബി.ആർ. അംബേദ്കറെ അപമാനിച്ച കേന്ദ്ര ആഭ്യന്തര മന്ത്രി അമിത് ഷാ രാജിവയ്ക്കണമെന്ന് ഡീൻ കുര്യാക്കോസ് എം.പി പറഞ്ഞു. അംബേദ്കറെ അപമാനിച്ചതിലൂടെ അമിത്ഷാ ഭരണഘടനയെ തന്നെയാണ് അവഹേളിച്ചിരിക്കുന്നത്. ചരിത്രത്തിൽ ഒരിക്കൽ പോലും ആർ.എസ്.എസ് ഭരണഘടനയെ ബഹുമാനിച്ചിട്ടില്ല. ഭരണഘടനയെയും ഭരണഘടനാ മൂല്യങ്ങളെയും ഒരേ പോലെ എതിർത്ത പാരമ്പര്യമാണ് ആർ.എസ്.എസിനും സംഘപരിവാർ സംഘടനകൾക്കുമുള്ളത്. മനുസ്മൃതിയെ മുറുകെ പിടിച്ച്, ഭാരതീയ ദേശീയതയുമായി ബന്ധപ്പെട്ടതല്ല ബി.ആർ അംബേദ്കറുടെ നേതൃത്വത്തിൽ യാഥാർത്ഥ്യമാക്കിയ ഭരണഘടനയെന്ന് ആക്ഷേപിച്ചവരുടെ പാരമ്പര്യം പേറുന്ന അമിത് ഷാ മനപൂർവ്വമാണ് രാജ്യസഭയിലെ പ്രസംഗത്തിനിടെ അംബേദ്കറെ അവമാനിച്ചത്. എ.ഐ.സി.സിയുടെ നിർദ്ദേശമനുസരിച്ച് പ്രതിപക്ഷ എം.പിമാർ അവരുടെ മണ്ഡലങ്ങളിൽ നടത്തുന്ന വാർത്താ സമ്മേളനത്തിന്റെ ഭാഗമായി കട്ടപ്പനയിൽ മാദ്ധ്യമപ്രവർത്തകരോട് സംസാരിക്കുകയായിരുന്നു അദ്ദേഹം.