കുമളി: ഒറ്റപ്പെട്ടുകഴിയുന്ന മുതിർന്ന പൗരന്മാരുടെ സംരക്ഷണം സമൂഹം ഏറ്റെടക്കേണ്ടതുണ്ടെന്ന് വനിതാകമ്മിഷൻ അംഗം വി.ആർ. മഹിളാമണി പറഞ്ഞു. കുമിളി വ്യാപാരഭവനിൽ നടന്ന ജില്ലാതല വനിതാ കമ്മിഷൻ അദാലത്തിന് ശേഷം സംസാരിക്കുകയായിരുന്നു അവർ. മുതിർന്ന സ്ത്രീകളുടെ പരാതി പരിഗണിച്ചാണ് കമ്മിഷന്റെ വിലയിരുത്തൽ. പരാതിക്കാരിൽ ചിലർ വിധവകളും മക്കളില്ലാത്തവരുമാണ്. ഇത്തരം സാഹചര്യങ്ങളിലുണ്ടാവുന്ന ഒറ്റപ്പെടൽ അവരുടെ മാനസിക സ്ഥിതിയെ പ്രതികൂലമായി ബാധിക്കുന്നതായി മഹിളാമണി പറഞ്ഞു. സാമൂഹിക പ്രശ്നമായി കണ്ട് ഇക്കാര്യത്തിൽ പരിഹാരം കാണമെന്ന് കമ്മിഷൻ അഭിപ്രായപ്പെട്ടു. ജാഗ്രതാ സമിതികൾ ഈ വിഷയം ഗൗരവത്തിലെടുക്കണം. കൂട്ടായ ആലോചനകളിലൂടെ ക്രിയാത്മകമായ പരിഹാരം കണ്ടെത്തണം. ഭൂമി സംബന്ധമായതും അതിരു തർക്കവുമായി ബന്ധപ്പെട്ട അയൽവാസികളുടെ കലഹങ്ങളും അദാലത്തിൽ പരാതിയായി എത്തി. ആകെ 48 കേസുകളാണ് പരിഗണിച്ചത്. 13 പരാതികളിൽ പരിഹാരം കണ്ടു. അഞ്ച് കേസുകളിൽ റിപ്പോർട്ട് തേടി. ഒരു കേസ് ജില്ലാ നിയമ സഹായ അതോറിറ്റിക്ക് അയച്ചതായും വി.ആർ. മഹിളാമണി പറഞ്ഞു.