തലശ്ശേരി: ജനകീയ പങ്കാളിത്തത്തോടെ ചൊക്ലിയിൽ സാക്ഷാത്കരിച്ച ആധുനിക സൗകര്യങ്ങളുള്ള കുടുംബാരോഗ്യ കേന്ദ്രം 26ന് ഉച്ചക്ക് രണ്ട് മണിക്ക് ആരോഗ്യ മന്ത്രി വീണ ജോർജ് നാടിന് സമർപ്പിക്കുമെന്ന് പഞ്ചായത്ത് പ്രസിഡന്റ് സി.കെ.രമ്യയും മെഡിക്കൽ ഓഫീസർ ഡോ.എം. നീതുവും വാർത്താസമ്മേളനത്തിൽ അറിയിച്ചു. സ്പീക്കർ അഡ്വ. എ.എൻ.ഷംസീർ അദ്ധ്യക്ഷത വഹിക്കും. എം.എൽ.എ ആസ്തി വികസന ഫണ്ടിൽ നിന്ന് അനുവദിച്ച 1.75 കോടി രൂപയും എൽ.എസ്.ജി.ഡി. ഫണ്ട് 70 ലക്ഷം രൂപയും എൻ.എച്ച്.എം. അനുവദിച്ച 15 ലക്ഷം രൂപയും ആശുപത്രിക്കായി മാറ്റിയ അവസരത്തിൽ 15 ദിവസം കൊണ്ട് ജനകീയമായി കണ്ടെത്തിയ 62 ലക്ഷം രൂപയും മുതൽക്കൂട്ടായി. ലബോറട്ടറി, ഫിസിയോ തെറാപ്പി യൂണിറ്റ്, ഒ.പി., വയോജന പാർക്ക്, ചിൽഡ്രൻസ് പാർക്ക്, തുടങ്ങിയ സൗകര്യങ്ങളും സംവിധാനങ്ങളും കുടുംബാരോഗ്യ കേന്ദ്രത്തിൽ സജ്ജമാണ്. കെ.എം. പവിത്രൻ, പി.കെ.യൂസഫ് എന്നിവരും വാർത്താസമ്മേളനത്തിൽ സംബന്ധിച്ചു.