ഉദ്ഘാടനം​ ഇന്ന്

​കടലുണ്ടി​: പരിസ്ഥിതി സൗഹൃദ ടൂറിസം ലക്ഷ്യമിട്ട് കടലുണ്ടി പക്ഷി സങ്കേതത്തിൽ ​നിർമ്മി​​ച്ച ​ പ്രകൃതി സഞ്ചാര പാത ഇന്ന് വൈകിട്ട് 6 ന് പൊതുമരാമത്ത് -ടൂറിസം മന്ത്രി പി.എ.മുഹമ്മദ് റിയാസ് ഉദ്ഘാടനം ചെയ്യും.​ കടലുണ്ടി ഗ്രാമപഞ്ചായത്ത് പ്രസിഡന്റ് വി.അനുഷ അദ്ധ്യക്ഷത വഹിക്കും. ജില്ലാ കളക്ടർ സ്നേഹിൽ കുമാർ സിംഗ് മുഖ്യാതിഥിയാവും. ടൂറിസം വകുപ്പ് 1.10 കോടി രൂപ ചെലവിട്ടാണ് കടലുണ്ടിപ്പുഴയോരത്ത് ടൂറിസം വികസനം നടപ്പാക്കിയത്. പുഴയോരത്ത് പാർശ്വഭിത്തി കെട്ടി നിരപ്പാക്കിയ പാതയിൽ പൂട്ടുകട്ട പാകി. അലങ്കാര വിളക്കുകൾ, ഇരുമ്പു കൈവരി എന്നിവയെല്ലാം ഒരുക്കിയിട്ടുണ്ട്. ഇരിപ്പിടങ്ങൾ, ശുചിമുറി, കഫെറ്റീരിയ, ലാൻഡ് സ്കേപ്പിംഗ് എന്നിവയുമുണ്ട്. കമ്യൂണിറ്റി റിസർവ് ഇക്കോ ടൂറിസം കേന്ദ്രത്തിൽ എത്തുന്ന സഞ്ചാരികൾക്ക് പുഴ സൗന്ദര്യം ആസ്വദിച്ച് വിശ്രമിക്കാനും പക്ഷി സങ്കേതത്തിന്റെ സൗന്ദര്യം നുകരാനും കഴിയും. കടലുണ്ടിയുടെ ടൂറിസം വികസനം ലക്ഷ്യമിട്ട് ഇക്കോ ടൂറിസം കേന്ദ്രം ഓഫീസ് പരിസരം മുതൽ കടലുണ്ടിക്കടവ് പാലം വരെ 1.10 കിലോമീറ്ററിൽ പുഴയോരത്ത് നിർമ്മിക്കുന്ന നടപ്പാതയുടെ ആദ്യഘട്ടമാണ് ഇപ്പോൾ പൂർത്തിയാക്കിയത്. രണ്ടാം ഘട്ടത്തിൽ ചെമ്പേത്തോട് കടലുണ്ടിപ്പുഴയിൽ ചേരുന്ന ഭാഗത്ത് പാലം നിർമിച്ച് സഞ്ചാരപാത കടലുണ്ടിക്കടവ് പാലം പരിസരത്തേക്ക് ദീർഘിപ്പിക്കും.

ചെലവ്

1.10 കോടി

വീത്

2 മീറ്റർ

നീളം

200 മീറ്റർ