കുന്ദമംഗലം: കോഴിക്കോട് എൻ.ഐ.ടി-യിൽ അന്താരാഷ്ട്ര ശാസ്ത്ര സമ്മേളനം ഇന്റർനാഷണൽ കോൺഫറൻസ് ഓഫ് എനർജി, എൻവൊയർമെന്റ് ആൻഡ് ഹെൽത്ത് കെയർ ആരംഭിച്ചു. മെറ്റീരിയൽസ് സയൻസ് ആൻഡ് എഞ്ചിനീയറിംഗ് വിഭാഗം സംഘടിപ്പിച്ച ദ്വിദിന സമ്മേളനം എൻ.ഐ.ടി ഡയറക്ടർ ഇൻ ചാർജ് പ്രൊഫ. പ്രിയ ചന്ദ്രൻ ഉദ്ഘാടനം ചെയ്തു. എൻ ഐ ടി യിലെ പ്രൊഫ.സി.ബി.ശോഭൻ അദ്ധ്യക്ഷത വഹിച്ചു. റൈസ് സർവകലാശാലയിലെ പ്രൊഫ. പി.എം. അജയനും ജർമ്മനിയിലെ കാൾഷ്രൂഹെ ഇൻസ്റ്റിറ്റ്യൂട്ട് പ്രൊഫ. ക്രിസ്റ്റ്യൻ കുബലും മുഖ്യപ്രഭാഷണം നടത്തി. ഊർജ്ജം, പരിസ്ഥിതി, ആരോഗ്യസംരക്ഷണം എന്നിവയിലുള്ള അനുഭവങ്ങളും ഗവേഷണ ഫലങ്ങളും കൈമാറാനും പങ്കിടാനും ഏറ്റവും പുതിയ കണ്ടുപിടുത്തങ്ങൾ, പ്രവണതകൾ, ഈ മേഖലകളിൽ അഭിമുഖീകരിക്കുന്ന പ്രായോഗിക വെല്ലുവിളികൾ, പരിഹാരങ്ങൾ എന്നിവ ചർച്ച ചെയ്യുന്നതുമാണ് ലക്ഷ്യം. 400 ലധികം പേരും 150 പ്രബന്ധങ്ങളും ഉൾക്കൊള്ളുന്ന സമ്മേളനത്തിൽ പ്രൊഫ. ടി എസ് സമ്പത്ത് കുമാർ,​ ഡോ.സൈകത് തലപത്ര, എൻ.വി രവികുമാർ , പ്രൊഫ. ഡഗ്ലസ് ഗാൽവാഓ ,പ്രൊഫ രഞ്ജിത്ത് ബൗരി, ഡോ. സന്താന ഈശ്വര, ഡോ. ടെട്സുഓ ഒയ്ക്കാവ എന്നിവർ പ്രഭാഷണങ്ങൾ നടത്തും. റോയൽ സൊസൈറ്റി ഓഫ് കെമിസ്ട്രി (ആർഎസ്സി), അമേരിക്കൻ കെമിക്കൽ സൊസൈറ്റി (എസിഎസ്) എന്നിവയുൾപ്പെടെ പ്രശസ്ത പ്രസാധകർ മികച്ച പ്രബന്ധങ്ങൾക്ക് അവാർഡ് നൽകും.