സുൽത്താൻ ബത്തേരി: വയനാട് വന്യജീവി സങ്കേതത്തോട് ചേർന്ന് കിടക്കുന്ന ലീസ് ഭൂമിയിൽ നിന്ന് പുള്ളിമാനിനെ വേട്ടയാടിയ അഞ്ചംഗ സംഘത്തെ വനം വകുപ്പ് അറസ്റ്റ് ചെയ്തു . ഇവരുടെ പക്കൽ നിന്ന് മൂന്ന് തോക്കുകളും 49 കിലോ മാനിറച്ചിയും കണ്ടെടുത്തു. ഇന്നലെ പകൽ 12 മണിയോട് കൂടി പൊൻകഴി സെക്ഷൻ ഫോറസ്റ്റ് പരിധിയിൽ വരുന്ന മുറിയൻകുന്ന് വെച്ചായിരുന്നു മാൻ വേട്ട. തൃശ്ശിലേരി നുഞ്ചിക്കണ്ടി വീട്ടിൽ ചന്ദ്രൻ (37), മേപ്പാടി പുതുക്കാട് പള്ളി പറമ്പ് ബാബുമോൻ (42) , കാട്ടിക്കുളം അറ്റാത്ത് വീട്ടിൽ എ.വി. അനീഷ് (20), പ്രകാശൻ (23), ബാലുശ്ശേരി പനങ്ങാട് കാരന്നൊത്ത് വീട്ടിൽ രഞ്ജിത്ത് (31) എന്നിവരാണ് അറസ്റ്റിലായത്. സെക്ഷൻ ഫോറസ്റ്റ് ഓഫീസർ എ. അനിൽകുമാറിന്റെ നേതൃത്വത്തിൽ മുറിയൻ കുന്നിൽ വനപരിശോധന നടത്തുന്നതിനിടെയാണ് വന പാലകര കണ്ടയുടനെ രണ്ട് പ്രതികൾ ഓടി മറഞ്ഞത്. ഇവരെ പിൻതുടർന്ന് പിടികൂടിയതോടെയാണ് മാൻ വേട്ടയുടെ വിവരം പുറത്തായത്. പിടിയിലായ രണ്ട് പേരെ വിശദമായി ചോദ്യം ചെയ്തതോടെയാണ് സംഭവ സ്ഥലത്ത് ഒളിവിൽ കഴിഞ്ഞിരുന മൂന്ന് പേരെയും പിടി കൂടാനായത്. ലീസ് ഭൂമിയിൽ ഒളിപ്പിച്ചു വെച്ച നിലയിൽ മാനിറച്ചിയും ഒരു എയർ ഗണ്ണും രണ്ട് നാടൻ തോക്കും കണ്ടെടുത്തു. രാത്രി മാനിനെ വെടിവെച്ച ശേഷം പകൽ തെരഞ്ഞ് കണ്ടെത്തി ഇറച്ചിയാക്കുകയായിരുന്നു. വനത്തോട് ചേർന്ന ലീസ് ഭൂമി സ്വകാര്യ വ്യക്തി ഡ്രാഗൺ ഫ്രൂട് കൃഷിക്കായി ഉപയോഗിച്ച് വരുകയായിരുന്നു. ബാബു മോന്റെ നേതൃത്വത്തിലാണ് കൃഷി ചെയ്തു വരുന്നത്. തോട്ടത്തിലെ പണിക്കാരാണ് പ്രതികളെല്ലാം. വേട്ട സംഘത്തിൽ കൂടുതൽ പ്രതികളുണ്ടെന്ന് സംശയിക്കുന്നു. വനംവകുപ്പ് അന്വേഷണം ഊർജിതമാക്കി.

സെക്ഷൻ ഫോറസ്റ്റ് ഓഫീസർക്ക് പുറമെ റെയിഞ്ച് ഫോറസ്റ്റ് ഓഫിസർ കെ.ജെ. സുധീൻ, ബി.എഫ്.ഒ മാരായ ജിബിത്ത് ചന്ദ്രൻ, ആർ. സതീഷ് കുമാർ, കെ. ഉമേഷ് , എ.വി. തങ്കമ്മ, ടി.പി. ഗിരിജ , എം.വി. ഗോവിന്ദൻ, കെ.വി. രജിത എന്നിവർ ചേർന്നാണ് പ്രതികളെ പിടികൂടിയത്.

വേട്ടയാടിയ പുള്ളിമാനിന്റെ ഇറച്ചിയുമായി പിടിയിലായ മാൻവേട്ട സംഘം