എരുമേലി: എരുമേലിയിൽ അയ്യപ്പഭക്തന്റെ ഷോൾഡർ ബാഗ് കീറി പണം മോഷ്ടിച്ച കേസിൽ മൂന്നു പേർ അറസ്റ്റിൽ. തമിഴ്‌നാട് ഉത്തമപാളയം സ്വദേശി പളനിസ്വാമി (45), കുമളി സ്വദേശി ഭഗവതി (53), തമിഴ്‌നാട് ഡിണ്ടിഗൽ സ്വദേശി മുരുകൻ (58) എന്നിവരെയാണ് എരുമേലി പൊലീസ് അറസ്റ്റ് ചെയ്തത്. ഇന്നലെ പുലർച്ചെ എരുമേലിയിലെ കൊച്ചമ്പലത്തിൽ നിന്നും വലിയമ്പലത്തിലേക്ക് പേട്ടതുള്ളൽ നടത്തുന്ന സമയത്താണ് സംഭവം. ഇവർ അന്യസംസ്ഥാന സ്വദേശിയായ അയ്യപ്പഭക്തന്റെ ഷോൾഡർ ബാഗ് കീറി അതിലുണ്ടായിരുന്ന പതിനാലായിരത്തോളം രൂപ മോഷ്ടിച്ച് കടന്നുകളയുകയായിരുന്നു.

പരാതിയെ തുടർന്ന് എരുമേലി പൊലീസ് കേസെടുത്ത് നടത്തിയ ശാസ്ത്രീയ പരിശോധനയിൽ മോഷ്ടാക്കളെ തിരിച്ചറിയുകയും ജില്ലാ പൊലീസ് മേധാവിയുടെ നേതൃത്വത്തിലുള്ള സ്‌ക്വാഡും, എരുമേലി പൊലീസും നടത്തിയ തിരച്ചിലിൽ മണിക്കൂറുകൾക്കുള്ളിൽ ഇവരെ പിടികൂടുകയുമായിരുന്നു. കാഞ്ഞിരപ്പള്ളി ഡിവൈ.എസ്.പി എം.അനിൽകുമാർ, എരുമേലി സ്റ്റേഷൻ എസ്.എച്ച്.ഒ ഇ.ഡി ബിജു, എസ്.ഐമാരായ രാജേഷ്, അബ്ദുൾ അസീസ്, സി.പി.ഒമാരായ വിനീത്, അനീഷ്, അൻസു എന്നിവരും സംഘത്തിലുണ്ടായിരുന്നു.