ഏഴാച്ചേരി: കാവിൻപുറം ഉമാമഹേശ്വര ക്ഷേത്രത്തിലെ ദേശതാലപ്പൊലി തിരുവാതിര മഹോത്സവത്തിന് നാളെ തുടക്കമാകും. നാളെ രാവിലെ 7 മുതൽ വിശേഷാൽ പൂജകൾ, 9ന് പ്രസാദ വിതരണം, വൈകിട്ട് വിശേഷാൽ ദീപാരാധന, ദീപക്കാഴ്ച. 27ന് രാവിലെ 6.40 മുതൽ അഷ്ടദ്രവ്യ മഹാഗണപതിഹോമം, 8ന് മുൻ മാളികപ്പുറം മേൽശാന്തി പുതുമന മനു നമ്പൂതിരിയുടെ നേതൃത്വത്തിൽ വിശേഷാൽ നവഗ്രഹപൂജ, 8.30ന് കലവറ നിറയ്ക്കൽ, 9.30ന് പെരുമന പത്മനാഭൻ നമ്പൂതിരിയുടെ നേതൃത്വത്തിൽ വിദ്യാഗോപാല മന്ത്രാർച്ചന, 11.30ന് അളനാട് സച്ചിദാനന്ദ നാരായണീയ സമിതി അവതരിപ്പിക്കുന്ന ദേവീ മാഹാത്മ്യ പാരായണം, 12.30ന് പ്രസാദമൂട്ട്, 1ന് തിരുവാതിരകളി വഴിപാടും മത്സരവും മാണി സി.കാപ്പൻ എം.എൽ.എ ഉദ്ഘാടനം ചെയ്യും. ഇത്തവണ വിവിധ ജില്ലകളിൽ നിന്നായി 30ൽപരം ടീമുകൾ തിരുവാതിരകളി വഴിപാടിൽ പങ്കെടുക്കും. വൈകിട്ട് 6.30ന് വിശേഷാൽ ദീപാരാധന, 7ന് നാട്ടരങ്ങ്. 28ന് പ്രസിദ്ധമായ താലപ്പൊലി ഘോഷയാത്ര. രാവിലെ 6.30ന് ഗണപതിഹോമം, 7 മുതൽ ഉദയാസ്തമനപൂജ, 9.30ന് ദേവീനാരായണീയ പാരായണം അരങ്ങേറും. 12.30ന് മഹാപ്രസാദമൂട്ട്, 1ന് വിദ്യാർത്ഥികൾക്കുള്ള ക്വിസ് മത്സരം. രാത്രി 7ന് പ്രസിദ്ധമായ ദേശതാലപ്പൊലി ഘോഷയാത്ര. ഏഴാച്ചേരി വടക്ക് കൊടുങ്കയത്തിൽ നിന്നും തെക്ക് പാറപ്പറമ്പിൽ നിന്നും ഘോഷയാത്രകൾ ആരംഭിക്കും. വഴിനീളെ താലപ്പൊലി എതിരേല്പ്. കാവിൻപുറം ജംഗ്ഷനിൽ താലപ്പൊലി ഘോഷയാത്രകൾ സംഗമിച്ച് സംയുക്ത ഘോഷയാത്രയായി ക്ഷേത്രസന്നിധിയിലേക്ക് നീങ്ങും. ജംഗ്ഷനിൽ 30ഓളം കലാകാരൻമാർ പങ്കെടുക്കുന്ന മേളത്രയം നടക്കും. താലമെടുക്കുന്ന സ്ത്രീകൾക്കും പെൺകുട്ടികൾക്കുമായി താലപ്രസാദ ഉണ്ണിയപ്പം വിതരണം ചെയ്യും. 8.30ന് വെടിക്കെട്ട്, 8.45ന് താലസദ്യ, 9ന് ഗാനമേള.