കോട്ടയം: സംസ്ഥാന കളരിപ്പയറ്റ് ചാമ്പ്യൻഷിപ്പിൽ ഏറ്റുമാനൂർ ചെറുവാണ്ടൂർ ശ്രീപതി സി.വി.എൻ കളരിയിലെ ആർ.ശ്രീജിത്തിന് തുടർച്ചയായി മൂന്നാം വർഷവും സ്വർണ്ണനേട്ടം. കേരള കളരിപ്പയറ്റ് അസോസിയേഷന്റെ ആഭിമുഖ്യത്തിൽ തിരുവനന്തപുരം സെൻട്രൽ സ്റ്റേഡിയത്തിൽ നടന്ന മത്സരത്തിലാണ് ശ്രീജിത്ത് ഗോൾഡ് മെഡൽ സ്വന്തമാക്കിയത്. 80 കിലോയിൽ താഴെയുള്ള സീനിയർ പുരുഷ വിഭാഗം ഫ്രീ ഹാൻഡ് ഫൈറ്റിലാണ് ശ്രീജിത്ത് മത്സരിച്ചത്. ചെറുവാണ്ടൂർ കെ.ജി മുരളീധര ഗുരുക്കൾ സ്ഥാപിച്ച ശ്രീപതി സി.വി.എൻ കളരിയിലെ മുഖ്യപരിശീലകനും മുൻ കളരി ചാമ്പ്യനും പൊലീസ് സബ് ഇൻസ്‌പെക്ടറുമായ മനോജ് മുരളീധര ഗുരുക്കളുടെയും സഹോദരൻ ബിജു മുരളീധര ഗുരുക്കളുടെയും കീഴിലാണ് പരിശീലനം നേടിയത്. ഏറ്റുമാനൂർ സരസ്വതി മന്ദിരം വീട്ടിൽ രാജുവിന്റെയും ശ്രീദേവിയുടെയും മകനാണ് ശ്രീജിത്ത്.