തിരുവനന്തപുരം: സുസ്ഥിര, പരിസ്ഥിതി സൗഹാർദ പദ്ധതികൾക്കുള്ള ഡിമാൻഡ് വർദ്ധിക്കുന്നതായി റിയൽ എസ്റ്റേറ്റ് കോൺക്ലേവ്. വരും വർഷങ്ങളിൽ കേരളത്തിലെ റിയൽ എസ്റ്റേറ്റ് മേഖലയുടെ വളർച്ച 10 ശതമാനത്തിലേറെയാകുമെന്ന് കോൺക്ളേവ് വിലയിരുത്തി. പങ്കെടുത്ത 60 ശതമാനം ഡെവലപ്പർമാരും ഇതേ അഭിപ്രായമാണ് പങ്കുവച്ചത്.
കേരളത്തിൽ റിയൽ എസ്റ്റേറ്റിന് മികച്ച വളർച്ച സാദ്ധ്യതകളുണ്ടെന്നാണ് ആഗോള ബിസിനസ് വിവര വിശകലന കമ്പനിയായ ക്രിസിൽ സർവേ ഫലം. ദക്ഷിണേന്ത്യൻ സംസ്ഥാനങ്ങളിലെ മൂന്ന് ശതമാനം പ്രോജക്ട് രജിസ്‌ട്രേഷനുകളുള്ള സംസ്ഥാനമാണ് കേരളം. വാടകയ്‌ക്ക് കൊടുക്കാൻ വേണ്ടി നിർമ്മിക്കുന്ന ഭവനങ്ങൾ, സീനിയർ ലിവിംഗ് കമ്യൂണിറ്റികൾ എന്നിവയ്‌ക്കാണ് കേരളത്തിൽ അടുത്ത അഞ്ച് വർഷത്തിനുള്ളിൽ വളർച്ച പ്രതീക്ഷിക്കുന്നത്.
തൃശൂർ, പാലക്കാട്, കൊല്ലം എന്നിവിടങ്ങളിൽ മികച്ച വളർച്ചയുണ്ടാവും. മൈക്രോമാർക്കറ്റുകളായ കൊച്ചിയിലെ ഇടപ്പള്ളി, പള്ളിക്കര, കളമശേരി, വാഴക്കാല, വൈറ്റില, തിരുവനന്തപുരത്തെ കവടിയാർ, തൃശൂരിലെ കുരിയച്ചിറ, പൂങ്കുന്നം തുടങ്ങിയവയ്ക്കും സാദ്ധ്യതകളുണ്ട്.