തിരുവനന്തപുരം: വട്ടിയൂർക്കാവിലെ സംഗീത നൃത്ത കലാകേന്ദ്രമായ ശ്രേഷ്ഠ പെർഫോമിങ് ആർട്സിന്റെ ആറാം വാർഷികാഘോഷം ഈ മാസം 14 ന്. വൈലോപ്പിള്ളി സംസ്‌കൃതി ഭവനിൽ വൈകുന്നേരം 6.30 ന് വട്ടിയൂർക്കാവ് എം. എൽ. എ. വി കെ പ്രശാന്ത് പരിപാടി ഉദ്ഘാടനം ചെയ്യും. ദ്വിദിന ആഘോഷ പരിപാടിയിൽ രാഷ്ട്രീയ കലാ സാംസ്‌കാരിക മേഖലകളിലെ പ്രമുഖർ പങ്കെടുക്കും. സൂര്യ ഇന്ത്യ ഫൗണ്ടർ & ഡയറക്ടറും കേരള സംഗീത നാടക അക്കാദമി മുൻ ചെയർമാനും സാമൂഹ്യ പ്രവർത്തകനുമായ സൂര്യ കൃഷ്ണമൂർത്തി, റിഗാറ്റ നാട്യ സംഗീത കേന്ദ്രം ഡയറക്ടർ ഗിരിജാചന്ദ്രൻ, ദേശീയ പുരസ്‌കാര ജേതാക്കളും സമുദ്രാ പെർഫോമിങ് ആർട്സിന്റെ ഡയറക്ടർമാരുമായ മധു ഗോപിനാഥ്, വക്കം സജീവ് തുടങ്ങിയവർ മുഖ്യാതിഥികളാകും.

ശ്രേഷ്ഠ പെർഫോമിങ് ആർട്സിന്റെ സ്ഥാപകരായ ശ്രീ ലതിൻ രാജ് പി എൽ, നർത്തകിയും ഭാര്യയുമായ ശ്രീമതി നിജ ലതിൻ എന്നിവർക്കൊപ്പം മിഥുൻ കെ എം ( എം എ മ്യൂസിക്, സ്വാതി തിരുനാൾ സംഗീത കോളേജ്), മിഥുൻ പി വി (എസ് കെ എ കോച്ച് & ദേശീയ കളരിപ്പയറ്റ് ചാമ്പ്യൻ) എന്നിവർ പരിപാടിക്ക് നേതൃത്വം നൽകും. രണ്ട് ദിവസത്തെ വാർഷികാഘോഷത്തിൽ വിവിധ കളരി സംഗീത നൃത്ത കലാപരിപാടികൾ നടക്കും. സമുദ്രാ പെർഫോമിങ് ആർട്സിന്റെ കൺടംപററി ഡാൻസ് പെർഫോമറായിരുന്ന ശ്രീ ലതിൻ 2018 ലാണ് ശ്രേഷ്ഠ പെർഫോമിങ് ആർട്സ് എന്ന സംഗീത നൃത്ത കലാ കേന്ദ്രത്തിന് തുടക്കമിട്ടത്. സംഗീതം, നൃത്തം, കളരി, യോഗ, ഫിറ്റ്നസ് എന്നിവയിൽ അനുഭവ സമ്പത്തുള്ള അധ്യാപകരുടെ ശിക്ഷണത്തിൽ 200 ഓളം കുട്ടികളാണ് ശ്രേഷ്ഠയിൽ പരിശീലിക്കുന്നത്.