ദിവസേന പുറത്തേക്ക് പോകുന്നവർക്ക് പല തരത്തിലുള്ള ചർമ പ്രശ്‌നങ്ങൾ വരാനുള്ള സാദ്ധ്യത കൂടുതലാണ്. പ്രത്യേകിച്ച് അമിതമായി ചൂടും പൊടിയും വെയിലും ഏൽക്കുന്നവർ. ഇത്തരത്തിലുള്ളവരുടെ മുഖത്ത് കരിവാളിപ്പും ചർമത്തിൽ ചുളിവും ഉണ്ടാവും. സൺസ്‌ക്രീൻ ഉപയോഗിച്ചാൽ ഒരു പരിധി വരെ ഈ പ്രശ്‌നങ്ങൾ ഉണ്ടാകുന്നത് തടയാം.
ഇനി ചർമപ്രശ്‌നങ്ങൾ ഉണ്ടായവരാണെങ്കിൽ അത് മാറാനായി വീട്ടിൽ തന്നെ ചെയ്യാവുന്ന ഒരു പാക്കുണ്ട്. ഈ ഫേസ്‌പാക്ക് ആഴ്‌ചയിൽ രണ്ട് ദിവസം പുരട്ടിക്കഴിഞ്ഞാൽ മുഖത്തെ ബ്ലാക്ക്‌ഹെഡ്‌സ് ഉൾപ്പെടെ മാറി ചർമം മൃദുവും തിളക്കമുള്ളതുമാകും. ഇതിന് ആവശ്യമുള്ള സാധനങ്ങൾ എന്തൊക്കെയാണെന്നും എങ്ങനെ തയ്യാറാക്കാമെന്നും നോക്കാം.
ആവശ്യമായ സാധനങ്ങൾ
ബീറ്റ്‌റൂട്ട് - 1 എണ്ണം
അരിപ്പൊടി - ഒന്നര ടേബിൾസ്‌പൂൺ
തേൻ / പാൽ - 1 ടീസ്‌പൂൺ
തയ്യാറാക്കുന്ന വിധം
ബീറ്റ്‌റൂട്ട് നന്നായി അരച്ച് ഒരു പാത്രത്തിലേക്ക് മാറ്റുക. അതിലേക്ക് അരിപ്പൊടി ചേർത്ത് ചൂടാക്കി കുറുക്കിയെടുക്കണം. ജലാംശം ഒട്ടും ഇല്ലാതെ വറ്റിച്ചെടുക്കുക. തണുക്കുമ്പോൾ ഇതിലേക്ക് അൽപ്പം പാൽ അല്ലെങ്കിൽ തേൻ ചേർത്ത് ഫേസ്‌പാക്കിന്റെ രൂപത്തിലാക്കാം. നിങ്ങളുടെ ചർമത്തിന് പാൽ അല്ലെങ്കിൽ തേൻ അലർജിയുണ്ടാക്കുമെങ്കിൽ പകരം വെള്ളം ചേർത്താൽ മതി.
ഉപയോഗിക്കേണ്ട രീതി
ഫേസ്‌വാഷ് അല്ലെങ്കിൽ പയറുപൊടി ഉപയോഗിച്ച് മുഖം നന്നായി കഴുകി വൃത്തിയാക്കുക. ശേഷം ഈ ഫേസ്‌പാക്ക് പുരട്ടിക്കൊടുക്കാവുന്നതാണ്. 15 - 20 മിനിട്ട് വച്ചശേഷം കഴുകി കളയാം.