ന്യൂയോർക്ക്: എരിവുള്ള ഭക്ഷണം ഇഷ്ടപ്പെടുന്നവർ ഏറെയാണ്. അത്തരത്തിൽ എരിവുള്ള ഭക്ഷണത്തിന്റെ ആരാധകനാണ് യു.എസിലെ കാലിഫോർണിയയിലെ സാൻഡിയാഗോയിലുള്ള ഗ്രിഗറി ഫോസ്റ്റർ. വീട്ടിൽ സ്വന്തമായി മുളക് കൃഷി പോലുമുണ്ട് ഇദ്ദേഹത്തിന്.

ഒരു മിനിറ്റിൽ ഏറ്റവും കൂടുതൽ ' ഗോസ്‌റ്റ് പെപ്പർ " (ഭൂത് ജൊലോകിയ) മുളക് കഴിച്ചതിന്റെ ഗിന്നസ് ലോക റെക്കാഡ് ഇദ്ദേഹത്തിനാണ്. 110.50 ഗ്രാം ഗോസ്‌റ്റ് പെപ്പറാണ് ( 17 എണ്ണം) ഇദ്ദേഹം ഒറ്റയടിക്ക് അകത്താക്കിയത്. കാനഡക്കാരനായ മൈക്ക് ജാക്കിന്റെ റെക്കാഡാണ് ഗ്രിഗറി തകർത്തത്.

2019ൽ 97 ഗ്രാം മുളകായിരുന്നു ജാക്ക് കഴിച്ചത്. ഏകദേശം 10,​00,​000ത്തിലേറെ സ്കോവിൽ സ്കെയിൽ യൂണിറ്റ് എരിവോട് കൂടിയ മുളകാണ് ഗോസ്‌റ്റ് പെപ്പർ. ഒരു മിനിറ്റിൽ 1.7 കോടി സ്കോവിൽ സ്കെയിൽ യൂണിറ്റ് എരിവാണ് ഗ്രിഗറിയുടെ ഉള്ളിലെത്തിയത്. സാധാരണ നല്ല എരിവോട് കൂടിയ പിരി പിരി മുളകിന് 50,000 -175,000 സ്കോവിൽ സ്കെയിൽ യൂണിറ്റ് എരിവാണുള്ളത്. !

ലോകത്തെ ഏറ്റവും വീര്യമേറിയ മുളക് ഇനങ്ങളിലൊന്നാണ് വടക്കുകിഴക്കൻ ഇന്ത്യയിൽ കൃഷി ചെയ്യുന്ന ഗോസ്‌റ്റ് പെപ്പർ. 2021 നവംബറിലാണ് ഇദ്ദേഹം റെക്കാഡ് സ്ഥാപിച്ചത്. എരിവ് കൂടിയ മറ്റൊരു മുളക് ഇനമായ കാരലൈന റീപ്പറും ഒരു മിനിറ്റിനുള്ളിൽ ഏറ്റവും കൂടുതൽ കഴിച്ചത് ഗ്രിഗറിയാണ് ( 120 ഗ്രാം).

സ്ഥിരം മുളക് കഴിച്ച് ശീലിച്ചതിനാലാണ് തനിക്ക് ഇത്തരം നേട്ടങ്ങൾ കൈവരിക്കാനായതെന്ന് ഗ്രിഗറി പറയുന്നു. മുളകിനോടുള്ള ഇഷ്ടം കൊണ്ട് 'ഇൻഫേർണോ ഫാംസ്" എന്ന പേരിൽ ഹോട്ട് സോസ് കമ്പനിയും ഗ്രിഗറി മുമ്പ് തുടങ്ങിയിരുന്നു.