മാറിവരുന്ന കാലാവസ്ഥയും തിരക്കേറിയ ജീവിതശൈലിയും കാരണം ധാരാളം പ്രശ്‌നങ്ങൾ അനുഭവിക്കുന്നവരാകും നിങ്ങൾ. പ്രത്യേകിച്ച് മുടിയുടെ കാര്യത്തിൽ. എത്ര ശ്രദ്ധിച്ചാലും വരൾച്ചയും അകാലനരയും ഉണ്ടാവുന്നു. ഇത് പരിഹരിക്കാൻ പല തരത്തിലുള്ള നാച്വറൽ വഴികളും മാർക്കറ്റിൽ ലഭിക്കുന്ന ഡൈകളും ഉപയോഗിക്കുന്നുണ്ടാവും നിങ്ങൾ. ഇതെല്ലാം പരീക്ഷിച്ചിട്ടും വളരെപ്പെട്ടെന്ന് നര വീണ്ടും വരുന്നു എന്ന പ്രശ്‌നം ഭൂരിഭാഗംപേരെയും അലട്ടുന്നുണ്ട്.

എന്നാൽ, ഇനി അങ്ങനെ സംഭവിക്കില്ല. വെറും ഒറ്റത്തവണത്തെ ഉപയോഗത്തിലൂടെ മാസങ്ങളോളം മുടി കട്ടക്കറുപ്പാക്കാൻ കഴിയുന്ന ഒരു ഹെയർ ഡൈ പരിചയപ്പെടാം. ഇതിന് ആവശ്യമായ സാധനങ്ങൾ എന്തൊക്കെയാണെന്നും എങ്ങനെയാണ് തയ്യാറാക്കേണ്ടതെന്നും നോക്കാം. ഇതേ രീതിയിൽ കൃത്യമായി ചെയ്‌താൽ ശരിയായ ഫലം ലഭിക്കുന്നതാണ്.

ആവശ്യമായ സാധനങ്ങൾ

നെല്ലിക്കപ്പൊടി - 4 ടേബിൾസ്‌പൂൺ

ചായപ്പൊടി - 2 ടേബിൾസ്‌പൂൺ

കറ്റാർവാഴ ജെൽ - 1 ടേബിൾസ്‌പൂൺ

തയ്യാറാക്കുന്ന വിധം

നെല്ലിക്കപ്പൊടിയും ചായപ്പൊടിയും ഒരു ഇരുമ്പ് പാത്രത്തിലെടുത്ത് നന്നായി ചൂടാക്കി കറുപ്പ് നിറത്തിലാക്കി എടുക്കുക. തണുക്കുമ്പോൾ ഇതിനെ പൊടിച്ചെടുത്ത് വീണ്ടും ഇരുമ്പ് പാത്രത്തിലാക്കി കുറച്ച് വെള്ളമൊഴിച്ച് തിളപ്പിച്ച് കുറുക്കിയെടുക്കണം. ഇതിലേക്ക് കുറച്ച് കറ്റാർവാഴ ജെൽ കൂടി ചേർത്ത് ഡൈ രൂപത്തിലാക്കി ഉപയോഗിക്കാം.

ഉപയോഗിക്കുന്ന വിധം

ഷാംപൂ ഉപയോഗിച്ച് കഴുകി വൃത്തിയാക്കിയ മുടിയിലേക്ക് വേണം ഡൈ പുരട്ടിക്കൊടുക്കാൻ. ഒന്നോ രണ്ടോ മണിക്കൂർ വച്ചശേഷം കഴുകി കളയാവുന്നതാണ്. കുളിക്കുമ്പോൾ ഷാംപൂ ഉപയോഗിക്കാൻ പാടില്ല. ആഴ്‌ചയിൽ രണ്ട് തവണ ഈ ഡൈ പുരട്ടാം. മുടി പൂർണമായും കറുത്തശേഷം പിന്നീട് നര വരുന്നെങ്കിൽ മാത്രം പുരട്ടിയാൽ മതി.