തിരുവനന്തപുരം: കുപ്രസിദ്ധ ഗുണ്ട കമ്രാൻ സമീർ പൊലീസ് പിടിയിൽ. വീട്ടിൽ കയറി ഗൃഹനാഥനെ നായയെ കൊണ്ട് കടിപ്പിച്ച സംഭവത്തിലാണ് കഠിനംകുളം പൊലീസ് പ്രതിയെ പിടികൂടിയത്. കഠിനംകുളം സ്വദേശി സക്കീറിനെയാണ് വീട്ടിനുള്ളിൽ അതിക്രമിച്ച് കയറി വളർത്തു നായയെ കൊണ്ട് ഇയാൾ കടിപ്പിച്ചത്. രണ്ടുദിവസം മുമ്പായിരുന്നു സംഭവം. കഠിനംകുളം സ്റ്റേഷനിലെ റൗഡി ലിസ്റ്റിൽ ഉൾപ്പെട്ടയാളാണ് കമ്രാൻ സമീർ.

സക്കീറിനെ കൂടാതെ രണ്ട് ഇതര സംസ്ഥാന തൊഴിലാളികൾക്കും നായയുടെ കടിയേറ്റു. പൊലീസിൽ പരാതി നൽകിയതിന് പിന്നാലെ സക്കീറിന്റെ വീടിന് നേരെ കമ്രാൻ പെട്രോൾ ബോംബേറും നടത്തി. തുടർന്ന് ഒളിവിൽ പോവുകയായിരുന്നു.

സമീറിനെതിരെ നിരവധി കേസുകൾ ഉണ്ട്. സക്കീറിന്റെ പരാതിയിൽ ജാമ്യമില്ല വകുപ്പുകൾ ചുമത്തിയാണ് കേസെടുത്തിരുന്നത്.സമീറിനെ ഉടൻ കോടതിയിൽ ഹാജരാക്കും.