മുഖസൗന്ദര്യത്തിൽ പ്രധാന പങ്ക് വഹിക്കുന്ന ഒന്നാണ് പുരികങ്ങൾ. എത്ര സമയമെടുത്ത് ഒരുങ്ങിയാലും പുരികം കട്ടിയില്ലെങ്കിൽ എന്തോ ഒരു കുറവുള്ളതുപോലെ മിക്കവരുടെയും മുഖത്ത് തോന്നിക്കാറുണ്ട്. പുരികത്തിന് കട്ടി തോന്നിക്കാനായി ഐബ്രോ പെൻസിൽ, ഐബ്രോ ജെൽ തുടങ്ങിയ വസ്തുക്കൾ ഉപയോഗിക്കുന്നവരും ധാരാളമുണ്ട്.

എന്നാൽ, ഇത്തരത്തിലുള്ള സാധനങ്ങൾ ശരിയായി ഉപയോഗിച്ചില്ലെങ്കിൽ വിചാരിക്കുന്ന ഫലം കിട്ടില്ല. ഈ മാർഗങ്ങളൊന്നും ഇല്ലാതെ പുരികം എങ്ങനെ നാച്വറലായി ഭംഗിയുള്ളതും കട്ടിയുള്ളതുമാക്കാം എന്നതിനെ പറ്റി അറിയാം. ഇത് ശരിയായി ചെയ്ത് കഴിഞ്ഞാൽ നിങ്ങൾക്ക് പുരികം ത്രെഡ് ചെയ്യേണ്ട ആവശ്യം പോലും വരുന്നില്ല. മാത്രമല്ല, മീശയും താടിയും വളരാനും സഹായിക്കും. ഇതിന് ആവശ്യമായ സാധനങ്ങൾ എന്തൊക്കെയാണെന്നും ചെയ്യേണ്ട രീതിയും നോക്കാം. ഒറ്റ ഉപയോഗത്തിൽ തന്നെ ഫലം കാണാൻ സാധിക്കും.

ആവശ്യമായ സാധനങ്ങൾ

ബദാം - 4 എണ്ണം

ചെമ്പരത്തി പൂവ് - 4 എണ്ണം

ആവണക്കെണ്ണ - 2 തുള്ളി

തയ്യാറാക്കുന്ന വിധം

ബദാം നന്നായി ചൂടാക്കി കരിച്ചെടുത്ത് തണുക്കുമ്പോൾ പൊടിച്ചെടുക്കുക. ഇതിലേക്ക് ചതച്ചെടുത്ത ചെമ്പരത്തിപ്പൂവ് കൂടി ചേർത്ത് യോജിപ്പിച്ച് ഒരു പാത്രത്തിലടച്ച് ഫ്രിഡ്‌ജിൽ സൂക്ഷിക്കുക. ഓരോ തവണ ഉപയോഗിച്ച ശേഷവും ഉടൻ ഫ്രിഡ്‌ജിൽ വയ്‌ക്കണം.

ഉപയോഗിക്കേണ്ട വിധം

രാത്രി ഉറങ്ങുന്നതിന് മുമ്പ് നേരത്തേ തയ്യാറാക്കിവച്ച കൂട്ട് പുരികത്തിലോ താടിയിലോ പുരട്ടിക്കൊടുക്കുക. രാവിലെ കഴുകി കളയാവുന്നതാണ്.