വൈകുന്നേരങ്ങളിൽ ചായ കുടിക്കുന്നതിനോടൊപ്പം ചെറുപലഹാരങ്ങൾ കഴിക്കാത്തവരായി ആരുംതന്നെ കാണില്ല. മിക്കപ്പോഴും ജങ്ക് ഫുഡുകളും എണ്ണ പലഹാരങ്ങളുമായിരിക്കും മുതിർന്നവർ കുട്ടികൾക്ക് വാങ്ങുന്നത്. അവ എത്രത്തോളം ആരോഗ്യപ്രദമാണെന്ന് നമുക്ക് ഉറപ്പിക്കാനാകില്ല. ഈ ശീലം തുടർന്നാൽ കുട്ടികൾക്കും മുതിർന്നവർക്കും ഒരുപോലെ ഗുരുതര രോഗങ്ങൾ ഉണ്ടാകാൻ സാദ്ധ്യത കൂടുതലാണ്. അതുകൊണ്ട് തന്നെ നാലുമണി പലഹാരങ്ങൾ വീട്ടിൽ തന്നെ തയ്യാറാക്കുന്നതാണ് എപ്പോഴും നല്ലത്.

നമ്മുടെ വീടുകളിൽ മിക്കപ്പോഴും ദോശമാവ് ബാക്കി വരാറുണ്ടല്ലേ?​ എങ്കിൽ ദോശമാവ് ഉപയോഗിച്ച് രുചികരമായ ഉള്ളി ബോണ്ട തയ്യാറാക്കുന്നത് എങ്ങനെയാണെന്ന് പരിചയപ്പെടാം.

ആവശ്യമായ സാധനങ്ങൾ

1.വെളിച്ചെണ്ണ – രണ്ട് ടീസ്പൂൺ

2.കടുക് – അര ടീസ്പൂൺ

3.ചുവന്ന ഉളളി അരിഞ്ഞത് – ഒരു കപ്പ്

4.വെളുത്തുള്ളി – ആവശ്യത്തിന്

5. വറ്റൽമുളക്- ആറെണ്ണം

6. കറിവേപ്പില- ആവശ്യത്തിന്

7.ദോശമാവ് – രണ്ട് കപ്പ്

8.ഉപ്പ് – ആവശ്യത്തിന്

9.എണ്ണ – ആവശ്യത്തിന്

തയ്യാറാക്കേണ്ട വിധം

പാനിൽ വെളിച്ചെണ്ണ ചൂടാക്കി കടുക് പൊട്ടിക്കുക. ഇതിലേയ്ക്ക് ചുവന്ന ഉളളി ചേർത്ത് വഴറ്റുക. ശേഷം വെളുത്തുളളി ചേർത്ത് വഴറ്റുക. ഇത് തണുത്ത് കഴിയുമ്പോൾ ദോശമാവിൽ ചേർത്ത് നന്നായി യോജിപ്പിക്കുക. എണ്ണ ചൂടാക്കി തയാറാക്കിവച്ചിരിക്കുന്ന മിശ്രിതം ഓരോ സ്പൂൺ വീതം കോരിയൊഴിച്ച് വറുത്ത് കോരുക. വിഭവം ചൂടോടെ ചട്നിയോടൊപ്പമോ സോസിനോടൊപ്പമോ വിളമ്പാം.