തിരുവനന്തപുരം: അടിയന്തര പരോൾ ലഭിക്കാൻ വ്യാജ മെഡിക്കൽ സർട്ടിഫിക്ക​റ്റ് ഹാജരാക്കി ഉത്ര കൊലക്കേസ് പ്രതി സൂരജ്. അച്ഛന് ഗുരുതര അസുഖമെന്ന് പറഞ്ഞാണ് ഇയാൾ പരോളിന് ശ്രമിച്ചത്. ഇതിനുവേണ്ടിയാണ് വ്യാജ മെഡിക്കൽ സർട്ടിഫിക്കറ്റ് ഹാജരാക്കിയത്. എന്നാൽ തട്ടിപ്പ് ജയിൽ അധികൃതർ പൊളിച്ചടുക്കി. പൂജപ്പുര സെൻട്രൽ ജയിൽ സൂപ്രണ്ടിന്റെ പരാതിയിൽ പൂജപ്പുര പൊലീസ് കേസെടുക്കുകയും ചെയ്തു.

പരോളിനായി സൂരജ് അപേക്ഷ നൽകിയെങ്കിലും അത് തള്ളിയിരുന്നു. ഇതിനെത്തുടർന്നാണ് അച്ഛന് ഗുരുതരമായ രോഗമാണെന്നും പരോൾ വേണമെന്നും ആവശ്യപ്പെട്ട് സൂപ്രണ്ടിന് അപേക്ഷ നൽകിയത്. ഇതിനൊപ്പം നൽകിയ ഡോക്ടർ സർട്ടിഫിക്ക​റ്റിൽ അച്ഛന് ഗുരുതര രോഗമാണെന്ന് രേഖപ്പെടുത്തിയിരുന്നു. ഇതിൽ വ്യക്തത വരുത്താനായി സർട്ടിഫിക്ക​റ്റ് നൽകിയ ഡോക്ടറോട് തന്നെ ജയിൽ വകുപ്പ് ഉദ്യോഗസ്ഥർ കൂടുതൽ കാര്യങ്ങൾ ചോദിച്ചു. ഒപ്പം സൂപ്രണ്ടിന് ലഭിച്ച സർട്ടിഫിക്ക​റ്റും അയച്ചുകൊടുത്തു. സർട്ടിഫിക്ക​റ്റ് നൽകിയത് താനാണെങ്കിലും അതിൽ ഗുരുതര അസുഖമെന്ന് രേഖപ്പെടുത്തിയിട്ടില്ലെന്നായിരുന്നു ഡോക്ടറുടെ മറുപടി.

ഇതോടെ സൂരജ് നൽകിയത് വ്യാജ രേഖയാണെന്ന് വ്യക്തമായി. ഡോക്ടർ സർട്ടിഫിക്ക​റ്റ് വാങ്ങിയ ശേഷം അതിൽ ഗുരുതര രോഗമെന്ന് എഴുതിച്ചേർത്തതെന്നാണ് കണ്ടെത്തൽ. തുടർന്നാണ് സൂരജിനെതിരെ സൂപ്രണ്ട് പൂജപ്പുര പൊലീസിൽ പരാതി നൽകിയത്. പുറത്തു നിന്നുള്ള ആരോ ആണ് വ്യാജരേഖയുണ്ടാക്കിയതെന്നാണ് വിവരം. അമ്മയായിരുന്നു സർട്ടിഫിക്ക​റ്റ് ഹാജരാക്കിയത്. സൂരജിനെയും അമ്മയെയും ചോദ്യം ചെയ്യും. ഒപ്പം സൂരജിനെ സഹായിച്ചവരെയും കണ്ടെത്തേണ്ടതുണ്ട്. പരോൾ സംഘടിപ്പിക്കാൻ വ്യാജ രേഖകളുണ്ടാക്കുന്ന സംഘമാണ് ഇതിന് പിന്നിലെന്ന സംശയുമുണ്ട്.

ഭാര്യ ഉത്രയെ പാമ്പിനെക്കൊണ്ട് കടിപ്പിച്ച് കൊലപ്പെടുത്തിയ കേസിൽ ഭർത്താവ് സൂരജിന് ജീവപര്യന്തം കഠിന തടവാണ് കോടതി വിധിച്ചത്. 2021 ഒക്ടോബർ 13നാണ് കോടതി 17 വർഷം തടവും, ശേഷം കഠിന തടവും വിധിച്ചത്.