വീട്ടിൽ അരി സൂക്ഷിക്കുമ്പോൾ അതിൽ പ്രാണികളും ചെറുജീവികളും കയറുന്നതും മുട്ടയിട്ട് പെരുകുന്നതും പലരും നേരിടുന്ന പ്രശ്‌നമാണ്. അരിയിലെ പെക്‌ടിൻ എന്ന ഫൈബർ ഇത്തരം പ്രാണികൾക്ക് ഊർജം നൽകുമെന്ന് ചില പഠനങ്ങളിൽ കണ്ടെത്തിയിട്ടുണ്ട്. അരിയിൽ 254 മുട്ടകൾവരെ പെൺ പ്രാണികൾക്ക് ഇടാൻ സാധിക്കും. അരിയിലെ പോഷകങ്ങൾ കഴിച്ചാണ് ഈ ചെറുജീവികൾ വളരുന്നത്. അതിനാൽ തന്നെ നമ്മൾ ഉപയോഗിക്കുന്നത് പലപ്പോഴും കേടുവന്ന പോഷകങ്ങൾ നഷ്ടമായ അരിയായിരിക്കും. ചില പൊടിക്കൈകൾ ഉപയോഗിച്ച് ഇത്തരം പ്രാണികളെ പൂർണമായി അകറ്റാൻ സാധിക്കും.
വേപ്പില: വേപ്പിലയിലെ ശക്തമായ മണം പ്രാണികളെ അകറ്റും. കുറച്ച് ഉണങ്ങിയ വേപ്പില അരിയിൽ വിതറുന്നത് പ്രാണികളെ മുഴുവൻ ഓടിക്കും.
ബേ ഇല (വയനയില): മൂന്നോ നാലോ വഴയിന അരിയിൽ വിതറി നന്നായി അടച്ചുവയ്ക്കുക. ഇതിന്റെ മണം പ്രാണികളെ അകറ്റുകയും മുട്ടയിട്ട് പെരുകുന്നത് തടയുകയും ചെയ്യും.
ഗ്രാമ്പൂ: ഗ്രാമ്പൂവിന്റെ ശക്തമായ മണവും പ്രാണികളെ അകറ്റും.
പുതിന ഇല: പുതിന ഇല അരിയിൽ ഇട്ടുവയ്ക്കുന്നതും പ്രാണികളെ അകറ്റും. എന്നാൽ ഇലയിൽ നനവുണ്ടാകാൻ പാടില്ല. നനവുള്ള ഇല അരി കേടുവരുന്നതിന് കാരണമാവുകയും ആരോഗ്യപ്രശ്‌നങ്ങൾ ഉണ്ടാക്കുകയും ചെയ്യും.
വെളുത്തുള്ളി: വെളുത്തുള്ളിയിലെ സൾഫർ ഒരു കീടനാശിനിയായി പ്രവർത്തിക്കുന്നു. വെളുത്തുള്ളി അല്ലികൾ അരിയിലിട്ട് സൂക്ഷിക്കാം.
തീപ്പെട്ടി: തീപ്പെട്ടി തുറന്ന് അരിക്ക് സമീപത്തായി വയ്ക്കാം. തീപ്പെട്ടിയിലെ സൾഫർ ഫംഗിസൈഡ് ആയി പ്രവർത്തിക്കുകയും പ്രാണികളെ അകറ്റുകയും ചെയ്യും.
അരിയിൽ പ്രാണികൾ കടന്നാൽ അത് വെയിലത്ത് കുറച്ചുനേരം വയ്ക്കുന്നത് പ്രാണികൾ പോകാൻ സഹായിക്കും. കുറച്ച് അരി മാത്രമേ ഉള്ളൂവെങ്കിൽ അത് ഫ്രിഡ്‌ജിൽ സൂക്ഷിക്കാം.
