മുംബയ്: ഉപഭോക്താക്കളുടെ താൽപ്പര്യങ്ങൾ മുൻനിർത്തിയും നിയമങ്ങൾ ലംഘിക്കുന്ന സാഹചര്യത്തിലും റിസർവ് ബാങ്ക് ഓഫ് ഇന്ത്യ (ആർബിഐ) കർശന നടപടി സ്വീകരിക്കാറുണ്ട്. ഇന്ത്യയിൽ 2024ൽ ആർബിഐ വിവിധ നിയമലംഘനങ്ങളുടെ പേരിൽ ഒട്ടേറെ ബാങ്കുകളുടെ ലൈസൻസ് റദ്ദാക്കിയിട്ടുണ്ട്. ആ ബാങ്കുകൾ ഏതൊക്കെയാണെന്ന് നോക്കാം.

2024ൽ 11 ബാങ്കുകളുടെ ലൈസൻസാണ് ആർബിഐ റദ്ദാക്കിയത്. ഇനി ഒരിക്കലും തുറക്കാൻ സാധിക്കാത്ത തരത്തിലാണ് ആർബിഐ നടപടി സ്വീകരിച്ചത്. ഈ ബാങ്കുകളിൽ ട്രാൻസാക്ഷൻ നടത്താനോ ഡെപ്പോസിറ്റ് സ്വീകരിക്കാനോ സാധിക്കില്ല. ഈ ബാങ്കുകളെല്ലാം തുടരുന്നത് നിക്ഷേപകർക്ക് ദോഷകരമാകുമെന്ന് ആർബിഐ നോട്ടീസ് നൽകിയിട്ടുണ്ട്. ഈ ബാങ്കുകൾക്ക് മൂലധനവും വരുമാനവും ഇല്ലാതായി. ഇത്തരമൊരു സാഹചര്യത്തിൽ 1949ലെ ബാങ്കിംഗ് നിയമത്തിലെ പല വ്യവസ്ഥകളും ലംഘിക്കപ്പെടുന്നു.

കൂടാതെ ഈ ബാങ്കുകൾക്ക് നിക്ഷേപകർക്ക് അവരുടെ പണം തിരിച്ചുനൽകാൻ കഴിഞ്ഞില്ല. അതുകൊണ്ട് പൊതുതാൽപര്യം കണക്കിലെടുത്ത് ഈ ബാങ്കുകളുടെ ലൈസൻസ് ആർബിഐ റദ്ദാക്കുകയായിരുന്നു. 2024ൽ ആർബിഐ ലൈസൻസ് റദ്ദാക്കിയ ബാങ്കുകൾ ഏതൊക്കെയാണെന്ന് നോക്കാം..

1, ദുർഗ കോ-ഓപ്പറേറ്റീവ് അർബൺ ബാങ്ക് ലിമിറ്റഡ്, വിജയവാഡ, ആന്ധ്രാപ്രദേശ്
2, ശ്രീ മഹാലക്ഷ്മി മെർക്കന്റൈൽ കോ-ഓപ്പറേറ്റീവ് ബാങ്ക് ലിമിറ്റഡ്, ദാബോളി, ഗുജറാത്ത്
3, ദ ഹിരിയൂർ അർബൺ കോ-ഓപ്പറേറ്റീവ് ബാങ്ക് ലിമിറ്റഡ് ഹിരിയൂർ, കർണാടക
4, ജയ് പ്രകാശ് നാരായൺ നഗരി സഹകാരി ബാങ്ക് ലിമിറ്റഡ്, ബസ്മത്നഗർ, മഹാരാഷ്ട്ര
5, സുമേർപൂർ മെർക്കന്റൈൽ അർബൻ കോ-ഓപ്പറേറ്റീവ് ബാങ്ക് ലിമിറ്റഡ്, സുമർപൂർ, പാലി രാജസ്ഥാൻ
6, പൂർവാഞ്ചൽ കോ-ഓപ്പറേറ്റീവ് ബാങ്ക് ലിമിറ്റഡ്, ഗാസിപൂർ, യുപി
7, സിറ്റി കോഓപ്പറേറ്റീവ് ബാങ്ക് ലിമിറ്റഡ്, മുംബൈ, മഹാരാഷ്ട്ര
8, ബനാറസ് മെർക്കന്റൈൽ കോ-ഓപ്പറേറ്റീവ് ബാങ്ക് ലിമിറ്റഡ്, വാരണാസി
9, ഷിംഷാ സഹകാരി ബാങ്ക് നിയമിത്ര, മദ്ദൂർ, മാണ്ഡ്യ, കർണാടക
10, ഉറവകൊണ്ട കോ-ഓപ്പറേറ്റീവ് ടൗൺ ബാങ്ക് ലിമിറ്റഡ്, ആന്ധ്രാപ്രദേശ്
11, മഹാഭൈരബ് കോ-ഓപ്പറേറ്റീവ് അർബൻ ബാങ്ക് ലിമിറ്റഡ്, തേസ്പൂർ, അസം

ഈ ബാങ്കുകളിൽ നിക്ഷേപിച്ച തുക ഉപഭോക്താക്കൾക്ക് തിരികെ ലഭിക്കുമോ?
ഡിഐസിജിസി ആക്ട് 1961 ലെ വ്യവസ്ഥകൾ പ്രകാരം, ഒരു ബാങ്കിന്റെ ലൈസൻസ് റദ്ദാക്കപ്പെടുമ്പോഴെല്ലാം, ഓരോ ഉപഭോക്താവിനും ഡെപ്പോസിറ്റ് ഇൻഷുറൻസ് ആൻഡ് ഗ്യാരണ്ടി കോർപ്പറേഷനിൽ നിന്ന് 5 ലക്ഷം രൂപ വരെ ഡെപ്പോസിറ്റ് ഇൻഷുറൻസ് ക്ലെയിം തുക ലഭിക്കാൻ അർഹതയുണ്ട്.