പുതിയ പ്രതീക്ഷയുടെ ഒരു പുതിയ വര്‍ഷത്തിലേക്ക് നമ്മള്‍ പ്രവേശിക്കുകയാണല്ലോ, ഈ അവസരത്തില്‍ ആളുകൾ പുതിയ തീരുമാനങ്ങള്‍ എടുക്കാറുണ്ട്. എന്നാല്‍, ചിലര്‍ ഈ തീരുമാനങ്ങള്‍ എടുക്കുന്നതില്‍ ഒന്നും ഒരു കാര്യവുമില്ല എന്ന് ചിന്തിക്കുന്നവരാണ്. കാരണം പുതുവര്‍ഷത്തില്‍ എടുക്കുന്ന തീരുമാനങ്ങള്‍ വര്‍ഷം മുഴുവനും നടപ്പിലാക്കുന്നതില്‍ എല്ലാ വര്‍ഷവും പരാജയപ്പെടുന്നു എന്നുള്ളതാണ് അവരുടെ വാദം.
എന്നിരുന്നാലും കുറച്ചു കൂടി ക്രിയാത്മകമായ ഒരു തീരുമാനം എന്ന് പറയുന്നത് നമുക്ക് പുതുവര്‍ഷത്തില്‍ നടപ്പിലാക്കാനായി കുറച്ചു കാര്യങ്ങള്‍ ഉണ്ടാവുക എന്നുള്ളതാണ്. അത് നമ്മള്‍ വര്‍ഷം മുഴുവനും ചെയ്യുന്നുണ്ടോ ഇല്ലയോ എന്നുള്ളതിനേക്കാളുപരി നാം നമ്മളെ തന്നെ വിലയിരുത്തുന്നതും ഭാവിയെക്കുറിച്ച് പദ്ധതികള്‍ തയ്യാറാക്കുന്നതും നമ്മുടെ ജീവിത നിലവാരത്തെ മെച്ചപ്പെടുന്നതിന് സഹായിക്കും എന്നുള്ളത് ഒരു വസ്തുതയാണ്. ഒരു പദ്ധതിയും വിലയിരുത്തലും ഇല്ലാതിരിക്കുന്നത് നമ്മുടെ ജീവിതം ഒരു മുരടിച്ച അവസ്ഥയില്‍ തുടരുന്നതിന് കാരണമാകും എന്നത് എപ്പോഴും ഓര്‍ക്കുക. അതുകൊണ്ട് നമുക്ക് എല്ലാവര്‍ക്കും പുതുവര്‍ഷത്തില്‍ എടുക്കുവാന്‍ കുറഞ്ഞത് ഒരു തീരുമാനമെങ്കിലും ഉണ്ടാവുക എന്നുള്ളത് വളരെ അത്യാവശ്യമാണ്.
ഈ വര്‍ഷത്തില്‍ എടുക്കാന്‍ കഴിയുന്ന ഏറ്റവും പ്രധാനപ്പെട്ട ഒരു തീരുമാനം എന്ന് പറയുന്നത് ജീവിതത്തില്‍ സത്യസന്ധത പുലര്‍ത്തുക എന്നുള്ളതാണ്. കള്ളം പറയുന്നതിന് യാതൊരു മടിയും ഇല്ലാത്ത ഒരു സാമൂഹിക സാഹചര്യത്തിലാണ് നമ്മള്‍ ജീവിക്കുന്നത്. സത്യസന്ധമായി ജീവിക്കാം എന്നുള്ളത് വിപ്ലവാത്മകമായ ഒരു തീരുമാനമാണെന്ന് എപ്പോഴും ഓര്‍ക്കേണ്ടതാണ്. ജോര്‍ജ് ഓര്‍വല്‍ ഒരിക്കല്‍ പറഞ്ഞത് ഇങ്ങനെയാണ് “കള്ളവും വഞ്ചനയും നിറഞ്ഞ ഒരു സമൂഹത്തില്‍ സത്യം പറയുക എന്നുള്ളത് ഒരു വിപ്ലവാത്മകമായ പ്രവര്‍ത്തിയാണ്” ആയതിനാല്‍ സത്യം പറയുന്നത് വഴി ജീവിതത്തിലും സമൂഹത്തിലും വിപ്ലവകരമായ മാറ്റം കൊണ്ടുവരാന്‍ കഴിയും എന്നുള്ള വസ്തുത ഓര്‍ക്കുക.
നാം സത്യം പറയുമ്പോള്‍ താല്‍ക്കാലികമായി നമുക്ക് പലതരത്തിലുള്ള നഷ്ടങ്ങളും തിരിച്ചടികളും ഉണ്ടാവുമെങ്കിലും ആത്യന്തികമായി ജീവിതം കൂടുതല്‍ സംതൃപ്തിയോടുകൂടി മാറുന്നതായി കാണാന്‍ സാധിക്കും. താല്‍ക്കാലിക നേട്ടത്തിനു വേണ്ടി നാം ഒരു കള്ളം പറയുമ്പോള്‍ അത് നമ്മുടെ ഉള്ളില്‍ വലിയ രീതിയിലുള്ള ആശങ്കക്കും ആകുലതക്കും കാരണമാകുന്നു. എന്തെന്നാല്‍ ഒരു കാര്യം നമ്മള്‍ മറച്ചുവയ്ക്കുമ്പോള്‍ അത് മറഞ്ഞു തന്നെ ഇരിക്കാന്‍ വേണ്ടി നമ്മളുടെ മനസ് പല രീതിയില്‍ ശ്രമിച്ചുകൊണ്ടിരിക്കും, തൽഫലമായി നാം വലിയ രീതിയിലുള്ള മാനസിക സംഘര്‍ഷത്തില്‍ എത്തിച്ചേരുകയും ചെയ്യും.
ഒരു സിനിമയിലെ ഡയലോഗ് ഇങ്ങനെയാണ് “നാം സത്യം പറഞ്ഞു കഴിഞ്ഞാല്‍ നമ്മുടെ തലവേദന മാറി മറ്റുള്ളവര്‍ക്ക് തലവേദന പിടിക്കും”, അതായത് സത്യം പറയുന്നത് വരെ ആ തലവേദന നമുക്ക് ഉണ്ടായിരിക്കും സത്യം പറഞ്ഞു കഴിഞ്ഞാല്‍ കേള്‍ക്കുന്നവര്‍ക്ക് തലവേദന പിടിക്കുകയും ചെയ്യുമെന്നാണ്. നാം കള്ളമാണ് പറയുന്നതെങ്കില്‍ അത് പറയുന്നത് നമ്മുടെ ഉള്ളില്‍ തന്നെ വലിയ രീതിയിലുള്ള മാനസിക സംഘര്‍ഷത്തിന് കാരണമാകുന്നു. ജീവിതം കുറച്ചുകൂടി സ്വാതന്ത്ര്യത്തോടെയും സംതൃപ്തിയോടെയും മുന്നോട്ടു നയിക്കുന്നതിന് ഏറ്റവും പ്രധാന ഘടകം എന്ന് പറയുന്നത് സത്യസന്ധമായി സംസാരിക്കുക എന്നുള്ളത് തന്നെയാണ്.
അത് നമ്മുടെ മാനസികാരോഗ്യം വര്‍ദ്ധിപ്പിക്കുകയും ആശങ്കകളും ആകുലതകളും കുറഞ്ഞ ജീവിത അനുഭവം നമുക്ക് നല്‍കുകയും ചെയ്യും എന്നുള്ളത് ഈ പുതുവര്‍ഷത്തില്‍ നാം ഓര്‍ത്തിരിക്കേണ്ടത് അനിവാര്യമാണ്. ഇത്തരത്തില്‍ സത്യസന്ധമായി ജീവിതത്തില്‍ കാര്യങ്ങള്‍ നടപ്പിലാക്കാന്‍ കഴിഞ്ഞാല്‍ 2025ല്‍ നിങ്ങള്‍ക്ക് എടുക്കാന്‍ കഴിയുന്ന ഏറ്റവും നല്ല പുതുവത്സര പ്രതിജ്ഞ അതു തന്നെ ആയിരിക്കും എന്ന് ഓര്‍ക്കുക. ഇത് പാലിക്കുകയാണെങ്കില്‍ വരും വര്‍ഷങ്ങളെയും സന്തോഷത്തോടെ വരവേല്‍ക്കാനുള്ള ഒരു പ്രചോദനം നല്‍കുമെന്ന കാര്യത്തില്‍ യാതൊരു സംശയവും വേണ്ട.
Nithin A.F.
Consultant Psychologist
SUT Hospital, Pattom