പട്ടാമ്പി: ചാലിശ്ശേരി പെരുങ്ങോട് റോഡിൽ സ്വകാര്യ വ്യക്തിയുടെ പറമ്പിലെ വൻമരത്തിലെ ഭീമാകാരമായ പെരുംതേനീച്ചക്കൂട് നീക്കി. വെള്ളിയാഴ്ച രാത്രിയിൽ കൂട് ഇളകി തേനീച്ചകൾ സമീപത്തെ വീടിനുള്ളിലേക്ക് പറന്നെത്തിയിരുന്നു. പരിഭ്രാന്തരായ വീട്ടുകാർ പാമ്പുപിടുത്തക്കാരനും തേനീച്ച കൂടുകൾ നീക്കം ചെയ്യുന്നതിൽ വിദഗ്ധനുമായ കൈപ്പുറം അബ്ബാസിനെ വിവരം അറിയിക്കുകയായിരുന്നു. അബ്ബാസെത്തി മരത്തിന് മുകളിൽ കയറി ഒന്നര മീറ്ററോളം നീളമുള്ള പെരുംതേനീച്ച കൂട് ഒഴിവാക്കി കൊടുത്തു. ഈ ഈച്ചയുടെ കൂട്ടമായുള്ള കുത്തേറ്റാൽ മരണം വരെ സംഭവിക്കാറുണ്ടെന്ന് അബ്ബാസ് പറഞ്ഞു.