പത്തനംതിട്ട : ഭിന്നശേഷിക്കാരായ കുട്ടികളുടെ കഴിവുകളെ കണ്ടെത്തി പരിപോഷിപ്പിച്ച് അവരെ സമൂഹത്തിന്റെ മുഖ്യധാരയിൽ നിലനിറുത്തുന്നതിന് രക്ഷിതാക്കളും മുൻകൈയെടുക്കണമെന്ന് ജില്ലാ കളക്ടർ എസ്. പ്രേം കൃഷ്ണൻ പറഞ്ഞു. ജില്ലാ പഞ്ചായത്തും ജില്ലാ ഭരണകൂടവും സാമൂഹികനീതി വകുപ്പും സംയുക്തമായി സംഘടിപ്പിക്കുന്ന ഭിന്നശേഷി ദിനാഘോഷത്തിന്റെ ഭാഗമായുള്ള കലാകായിക മേള ഉണർവ് 2024 ഉദ്ഘാടനം ചെയ്യുകയായിരുന്നു കളക്ടർ.
തിരുവല്ല സബ് കളക്ടർ സുമിത് കുമാർ ഠാക്കൂർ പതാക ഉയർത്തി. ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ജിജി മാത്യു അദ്ധ്യക്ഷത വഹിച്ചു. ജില്ലാ പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ ആർ. അജയകുമാർ, ഇലന്തൂർ ബ്ലോക്ക് പഞ്ചായത്ത് പ്രസിഡന്റ് ജെ. ഇന്ദിരാദേവി, ഓമല്ലൂർ ഗ്രാമപഞ്ചായത്ത് പ്രസിഡന്റ് ജോൺസൺ വിളവിനാൽ, ജില്ലാ പഞ്ചായത്ത് പ്ലാനിംഗ് ഉപാദ്ധ്യക്ഷൻ ആർ. അജിത്ത് കുമാർ, ജില്ലാ സാമൂഹികനീതി ഓഫീസർ ജെ. ഷംലാ ബീഗം, കുടുംബശ്രീ ജില്ലാ മിഷൻ കോ-ഓർഡിനേറ്റർ എസ്. ആദില, എസ്. എസ്. കെ. ജില്ലാ പ്രോഗ്രാം ഓഫീസർ എ. പി. ജയലക്ഷ്മി, കൊഴുവല്ലൂർ മൗണ്ട് സിയോൺ ഇൻസ്റ്റിറ്റിയൂട്ട് ഒഫ് സയൻസ് ആൻഡ് ടെക്‌നോളജി പ്രിൻസിപ്പൽ ഡോ. കെ. മാത്യു, ഡിഫ് ഫോറം പ്രസിഡന്റ് മുഹമ്മദ് സലിം, ജില്ലാ പ്രൊബേഷൻ ഓഫീസർ ജി. സന്തോഷ്, ഭിന്നശേഷി സ്‌കൂൾ കുട്ടികൾ, അദ്ധ്യാപകർ തുടങ്ങിയവർ പങ്കെടുത്തു.