മല്ലപ്പള്ളി : നിയന്ത്രണം വിട്ട കാർ 22 അടി താഴ്ചയിലേക്ക് മറിഞ്ഞു. യാത്രക്കാരായ അമ്മയും മകനും അത്ഭുതകരമായി രക്ഷപ്പെട്ടു. കോട്ടയം-കോഴഞ്ചേരി സംസ്ഥാനപാതയിൽ മാത്തൻ ആശുപത്രി പടിയിലാണ് ഇന്നലെ വൈകിട്ട് 3.40 ന് അപകടമുണ്ടായത്. അമ്പിയിൽപ്പടി കോടമാക്കൽ മേപ്പുറത്ത് വീട്ടിൽ ജയകുമാറിന്റെ ഭാര്യ ദീപാജയൻ (44 ),​ മകൻ വിഘ്നേഷ് ജയകുമാർ (കണ്ണൻ 8 ) എന്നിവരാണ് അപകടത്തിൽപ്പെട്ടത്. തിരുവല്ലയിൽ നിന്ന് അമ്പിയിൽപ്പടിയിലെ വീട്ടിലേക്ക് വരുന്നതിനിടയിലാണ് അപകടം . ശബ്ദം കേട്ട സമീപവാസികളെത്തി യാത്രക്കാരെ കാറിന് പുറത്തെത്തിക്കുകയായിരുന്നു. വിഘ്നേശിന്റെ കൈയിൽ ചെറിയ മുറിവുണ്ട്.