തിരുവല്ല : സി.പി.എം 24-ാം പാർട്ടി കോൺഗ്രസിന് മുന്നോടിയായുള്ള തിരുവല്ല ഏരിയാ സമ്മേളനം 11മുതൽ 14വരെ കടപ്രയിൽ നടക്കും. 11ന് പതാക, കൊടിമര ജാഥകളും 12, 13 തീയതികളിൽ പ്രതിനിധി സമ്മേളനവും 14ന് റെഡ് വാളന്റിയർ മാർച്ചും പ്രകടനവും പൊതുസമ്മേളനവും നടക്കും. പ്രതിനിധി സമ്മേളന നഗരിയിൽ ഉയർത്താനുള്ള പതാക ചാത്തങ്കരിയിൽ രക്തസാക്ഷി പി.ബി സന്ദീപ് കുമാറിന്റെ സ്മൃതിമണ്ഡപത്തിൽ നിന്ന് പൊതുസമ്മേളന നഗരിയിൽ സ്ഥാപിക്കാനുള്ള കൊടിമരം നിരണത്ത് മുൻ ഏരിയാ കമ്മറ്റിഅംഗം എം.ജെ.അച്ചൻകുഞ്ഞിന്റെ സ്മൃതിമണ്ഡപത്തിൽ നിന്നും പതാക തലയാറിൽ മുൻ ഏരിയാ കമ്മിറ്റിഅംഗം കെ.ഗോപാലകൃഷ്ണ പണിക്കരുടെ സ്മൃതിമണ്ഡപത്തിൽ നിന്നും ജാഥയായി കൊണ്ടുവരും.വൈകിട്ട് 5.30ന് പൊതുസമ്മേളന നഗരിയിൽ സ്വാഗതസംഘം ചെയർമാൻ അഡ്വ.ഫ്രാൻസിസ് വി.ആന്റണി പതാക ഉയർത്തും. 12ന് രാവിലെ 9.30ന് ആലംതുരുത്തി റിയോ ടെക്സാസ് കൺവെൻഷൻ സെന്ററിൽ പ്രതിനിധി സമ്മേളനം ജില്ലാസെക്രട്ടറി കെ.പി ഉദയഭാനു ഉദ്ഘാടനം ചെയ്യും.പി.ബി സതീശ് കുമാർ റിപ്പോർട്ട് അവതരിപ്പിക്കും. സംസ്ഥാന കമ്മിറ്റിഅംഗം രാജു ഏബ്രഹാം, ജില്ലാ സെക്രട്ടേറിയറ്റ് അംഗങ്ങളായ എ.പത്മകുമാർ, പി.ജെ.അജയകുമാർ, ആർ.സനൽകുമാർ, ടി.ഡി.ബൈജു, ഓമല്ലൂർ ശങ്കരൻ, പി.ബി.ഹർഷകുമാർ പി.ആർ.പ്രസാദ്, നിർമ്മലാദേവി, അഡ്വ.ഫ്രാൻസിസ് വി.ആന്റണി, ജോസഫ് തോമസ് എന്നിവർ പ്രസംഗിക്കും. 14ന് വൈകിട്ട് 4ന് കടപ്ര ജംഗ്ഷനിൽനിന്ന് പ്രകടനവും ചുവപ്പുസേനാ പരേഡും ആരംഭിക്കും. 5ന് ആലംതുരുത്തി പാലം ജംഗ്ഷനിൽ ഒരുക്കുന്ന സീതാറാം യെച്ചൂരി - കൊടിയേരി ബാലകൃഷ്ണൻ നഗറിൽ പൊതുസമ്മേളനം മന്ത്രി വി.എൻ വാസവൻ ഉദ്ഘാടനം ചെയ്യും. തുടർന്ന് കലാപരിപാടികൾ നടക്കുമെന്നും ആക്ടിംഗ് സെക്രട്ടറി പി.ബി സതീശ് കുമാർ, സ്വാഗതസംഘം ചെയർമാൻ അഡ്വ.ഫ്രാൻസിസ് വി.ആൻ്റണി, ജനറൽ കൺവീനർ ജോസഫ് തോമസ് എന്നിവർ വാർത്താ സമ്മേളനത്തിൽ അറിയിച്ചു.