പത്തനംതിട്ട : നഗര സൗന്ദര്യവത്കരണത്തിന്റെ ഭാഗമായി സ്ഥാപിച്ച പൂച്ചെടികളുടെയും തണൽ മരങ്ങളുടെയും പരിപാലനത്തിന് പ്രത്യേക പദ്ധതി . ചെടികളുടെയും തണൽ മരങ്ങളുടെയും പരിപാലനത്തിനായി പരിശീലനം നേടിയവരെയാകും നിയോഗിക്കുക.

നഗരസൗന്ദര്യവത്കരണത്തിന്റെ ആദ്യഘട്ടമായി നഗരത്തിലെ പ്രധാന റോഡുവക്കിൽ ചട്ടികളിൽ പൂച്ചെടികൾ സ്ഥാപിച്ചിരുന്നു. ജനറൽ ആശുപത്രി മിനി സിവിൽ സ്റ്റേഷൻ റോഡ്, കുമ്പഴ എന്നിവിടങ്ങളിൽ ഇവയുടെ പരിപാലനം പദ്ധതിയിലൂടെ ഉറപ്പാക്കും. പുതിയതായി നിർമ്മിക്കുന്ന ടൗൺ സ്‌ക്വയർ, നവീകരണം പൂർത്തിയാകുന്ന നഗരസഭ ബസ് സ്റ്റാൻഡ് എന്നിവയോട് ചേർന്ന് വച്ചുപിടിപ്പിക്കുന്ന പൂച്ചെടികളുടെയും തണൽമരങ്ങളുടെയും പരിപാലനവും പദ്ധതിയുടെ ഭാഗമാകും.

പദ്ധതിയുടെ ഭാഗമായി ആറു പേരടങ്ങുന്ന രണ്ട് സംഘങ്ങളെയാണ് ആദ്യഘട്ടത്തിൽ നിയോഗിക്കുക. ഇവർക്ക് ഒരാഴ്ചയ്ക്കുള്ളിൽ പരിശീലനം നൽകും. കുടുംബശ്രീ അംഗങ്ങളായ വനിതകളെയാണ് പദ്ധതിയിൽ ഉൾപ്പെടുത്തിയിരിക്കുന്നതെന്ന് ചെയർമാൻ അഡ്വ.സക്കീർ ഹുസൈൻ പറഞ്ഞു.