തിരുവല്ല : ചക്കുളത്തുകാവ് ശ്രീഭഗവതി ക്ഷേത്രത്തിലെ പന്ത്രണ്ട് നൊയമ്പ് ഉത്സവത്തോടനുബന്ധിച്ച് നാരീപൂജ ഇന്ന് രാവിലെ 9ന് ക്ഷേത്രത്തിൽ നടക്കും. ക്ഷേത്ര മാനേജിംഗ് ട്രസ്റ്റി മണിക്കുട്ടൻ നമ്പൂതിരിയുടെ അദ്ധ്യക്ഷതയിൽ നടക്കുന്ന നാരീപൂജയിൽ വ്യവസായിയും സാമൂഹിക പ്രവർത്തകയുമായ റാണി മോഹൻദാസിന്റെ പാദം കഴുകി മുഖ്യകാര്യദർശി രാധാക്യഷ്ണൻ നമ്പൂതിരി ഉദ്ഘാടനം ചെയ്യും. മേൽശാന്തിമാരായ അശോകൻ നമ്പൂതിരി, രഞ്ജിത്ത് ബി. നമ്പൂതിരി, ദുർഗാദത്തൻ നമ്പൂതിരി എന്നിവർ കാർമ്മികത്വം വഹിക്കും. നാരീപൂജയ്ക്ക് മുന്നോടിയായി നടക്കുന്ന സാംസ്കാരിക സമ്മേളനത്തിൽ ജനപ്രതിനിധികൾ,സാമുദായിക,സാമൂഹിക,സാംസ്കാരിക പ്രവർത്തകർ എന്നിവർ പങ്കെടുക്കും.മീഡിയ കോഡിനേറ്റർ അജിത്ത് പിഷാരത്ത്, ഉത്സവകമ്മിറ്റി പ്രസിഡന്റ് രാജീവ്എം.പി, സെക്രട്ടറി പി.കെ.സ്വാമിനാഥൻ,ബിനു കെ.എസ് എന്നിവർ ചടങ്ങിന് നേത്യത്വംനൽകും. രമേശ് ഇളമൺ നമ്പൂതിരിയുടെ കാർമ്മികത്വത്തിൽ നടന്ന സർവ്വെശ്വര്യ സ്വസ്തിയഞ്ജം ഇന്നലെ സമാപിച്ചു. ചടങ്ങുകൾക്ക് മണിക്കുട്ടൻ നമ്പൂതിരി, രാധാകൃഷ്ണൻ നമ്പൂതിരി, അശോകൻ നമ്പൂതിരി, രഞ്ജിത്ത് ബി.നമ്പൂതിരി, ദുർഗാദത്തൻ നമ്പൂതിരി എന്നിവർ നേതൃത്വം നൽകി.