പത്തനംതിട്ട : ഫേസ്ബുക്ക് കൂട്ടായ്മയും നഗരസഭാ ഹരിത കർമ്മ സേനയും ചേർന്ന് മിനി സിവിൽ സ്റ്റേഷൻ മുറ്റത്ത് പൂന്തോട്ടമൊരുക്കി. നഗരസഭാ ആരോഗ്യ സ്റ്റാൻഡിംഗ് കമ്മിറ്റി ചെയർമാൻ ജെറി അലക്സ് ഉദ്ഘാടനം ചെയ്തു. വർഷങ്ങളായി കൂട്ടിയിട്ടിരുന്ന വിവിധ ഓഫീസ് വാഹനങ്ങളുടെ പഴയ ടയറുകൾ ഉപേക്ഷിക്കപ്പെട്ട പ്ലാസ്റ്റിക് ക്യാനുകൾ എന്നിവ ഉപയോഗിച്ച് പൂന്തോട്ടം വിപുലപ്പെടുത്താം എന്ന ആശയം പങ്കുവച്ചപ്പോൾ ഫേസ്ബുക്ക് കൂട്ടായ്മയിലെ സുഹൃത്തുക്കളും ഒപ്പം ചേർന്നു. വീട്ടുമുറ്റത്തെപ്പോലെ ഇവിടുത്തെ ചെടികളെയും സംരക്ഷിക്കുന്നതിന് സന്തോഷമാണെന്ന് പ്രവർത്തനങ്ങൾക്ക് മുൻകൈ എടുത്ത ജി.എസ്.ടി വകുപ്പിലെ അസിസ്റ്റന്റ് സ്റ്റേറ്റ് ടാക്സ് ഓഫീസർ ജി.ലേഖ പറഞ്ഞു. കെ.എസ്.ഡബ്ല്യു എം.പി കമ്മ്യൂണിക്കേഷൻ എക്സ്പേർട്ട് ശ്രീവിദ്യ ബാലൻ, പ്രോഗ്രാം നോഡൽ ഓഫീസർ മഞ്ചു പി.സക്കറിയ, ഗ്രീൻ വില്ലേജ് സീനിയർ പ്രൊജക്ട് കോഡിനേറ്റർ കെ.എസ് പ്രസാദ്, ഹരിതകർമ്മ സേന കൺസോ‌ർഷ്യം പ്രസിഡന്റ് ഷീനാ ബീവി, സെക്രട്ടറി കെ. ബിന്ദു തുടങ്ങിയവർ പങ്കെടുത്തു.