എഴുകോൺ : അയൽവാസിയായ സ്ത്രീയെ കടന്നു പിടിക്കുകയും കുട്ടികൾ ഉൾപ്പെടെയുള്ളവർക്ക് നേരെ നഗ്നതാ പ്രദർശനം നടത്തുകയും ചെയ്ത കേസിലെ പ്രതിയെ എഴുകോൺ പൊലീസ് ബലപ്രയോഗത്തിലൂടെ കീഴടക്കി. പവിത്രേശ്വരം ഇടവട്ടം കാരുവേലിൽ മണിയൻമുക്കിന് സമീപം തത്വമസിയിൽ ശ്രീജിത്തിനെ (38) ആണ് പിടികൂടിയത്. പരാതിയെ തുടർന്ന് വീട്ടിൽ അന്വേഷിച്ചെത്തിയ എഴുകോൺ സി.പി.ഒ എസ്.സുധീഷിന്റെ നേതൃത്വത്തിലുള്ള പൊലീസ് സംഘത്തിനെ അസഭ്യ വർഷത്തോടെയാണ് പ്രതി നേരിട്ടത്. കൈയ്യേറ്റ ശ്രമവും ബലപ്രയോഗവും ഉണ്ടായി. മൽപ്പിടിത്തത്തിലൂടെ കീഴടക്കിയാണ് ഇയാളെ പൊലീസ് വാഹനത്തിൽ കയറ്റിയത്. തുടർന്ന് പൊലീസ് സ്റ്റേഷനിലും വൈദ്യ പരിശോധനയ്ക്ക് എത്തിച്ച കൊട്ടാരക്കര താലൂക്ക് ആശുപത്രിയിലും പ്രതി പരാക്രമം നടത്തി.പൊലീസ് ഉദ്യോഗസ്ഥർക്ക് പുറമെ പൊതുജനങ്ങൾക്ക് നേരെയും അസഭ്യ വർഷവും വെല്ലുവിളിയും ഉണ്ടായി. പോക്സോയ്ക്ക് പുറമെ പൊലീസുകാരെ ഉപദ്രവിച്ചതിനും ജോലി തടസപ്പെടുത്തിയതിനും ഇയാൾക്കെതിരെ കേസെടുത്തു. കോതിയിൽ ഹാജരാക്കിയ പ്രതിയെ റിമാൻഡ് ചെയ്തു.