ചാത്തന്നൂർ: നെടുമ്പന ശ്രീകൃഷ്ണസ്വാമി ക്ഷേത്രത്തിനടുത്ത് വീടിന്റെ വാതിൽ തകർത്ത് മോഷണത്തിന് ശ്രമിച്ച പ്രതി അറസ്റ്റിൽ. പള്ളിമൺ ഇലവൂർ സ്വദേശി പ്രേംരാജ് (32) ആണ് അറസ്റ്റിലായത്. നെടുമ്പനക്കൽ വീട്ടിൽ ലക്ഷ്മിക്കുട്ടിയുടെ വീട്ടിലാണ് മോഷണ ശ്രമം നടന്നത്. ലക്ഷ്മിക്കുട്ടി അമ്മ ഒറ്റയ്ക്ക് താമസിക്കുന്ന വീട്ടിലെ സ്റ്റെയർകേസ് റൂമിന്റെ വാതിൽ തുറക്കാൻ ശ്രമിക്കുന്നത് അടുത്ത വീട്ടുകാരുടെ ശ്രദ്ധയിൽപ്പെട്ടതോടെ പ്രതി ഓടി രക്ഷപ്പെടുകയായിരുന്നു. കണ്ണനല്ലൂർ പോലീസ് ഇൻസ്പെക്ടർ രാജേഷിന്റെ നേത്യത്വത്തിൽ എസ്.ഐ മാരായ ജിബി, ഹരി സോമൻ, രാജേന്ദ്രൻപിള്ള സി.പി.ഒ മാരായ ഹുസൈൻ, സുധി, നജുമുദ്ദീൻ എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്. കൊട്ടാരക്കര കോടതിയിൽ ഹാജരാക്കി റിമാൻഡ് ചെയ്തു.