തൊടിയൂർ: പുതിയകാവ് - ചക്കുവള്ളി റോഡിൽ ചിറ്റുമൂല റെയിൽവേ മേൽപ്പാലം നിർമ്മാണത്തിന് കിഫ്ബി യുടെ അന്തിമ അനുമതി ലഭിച്ചതായി സി. ആർ.മഹേഷ് എം.എൽ.എ അറിയിച്ചു. ചിറ്റുമൂല മേൽപ്പാലത്തിന്റെ അന്തിമ അറേഞ്ച്മെന്റ് ഡ്രോയിംഗ് 2022ൽ സമർപ്പിച്ചതിന്റെ അടിസ്ഥാനത്തിൽ 39.53 കോടി രൂപയുട പുതുക്കിയ പ്രൊപ്പോസലിനാണ് കിഫ്ബി ഡയറക്ടർ ബോർഡിന്റെ അന്തിമ അനുമതി ലഭിച്ചത്. നിർമ്മാണച്ചുമതല റെയിൽവേ ബ്രിഡ്ജ് ആൻഡ് ഡെവലപ്മെന്റ് കോർപ്പറേഷനാണ്. ആദ്യം തയ്യാറാക്കിയ എസ്റ്റിമേറ്റിൽ നിന്ന് ഏകദേശം 11.5 കോടി രൂപയുടെ വർദ്ധനവ് വരുത്തിയാണ് പുതുക്കിയ 39.53 കോടി രൂപയ്ക്കുള്ള അനുമതി. ഡിസംബർ 6ന് ചേർന്ന എക്സിക്യുട്ടീവ് കമ്മിറ്റിയാണ് അന്തിമ അനുമതി നൽകിയത്. റെയിൽവേ ബ്രിഡ്ജ് ആൻഡ് ഡെവലപ്മെന്റ് കോർപ്പറേഷൻ ഈ ആഴ്ച തന്നെ ടെണ്ടർ നടപടികൾ സ്വീകരിക്കുമെന്ന് സി.ആർ. മഹേഷ് എം.എൽ.എ അറിയിച്ചു.