അഞ്ചൽ: കല്ലടയാറ്റിൽ ഒഴുക്കിൽപ്പെട്ട് കാണാതായയാളുടെ മൃതദേഹം എലിക്കാട്ടൂർ പാലത്തിന് സമീപം കണ്ടെത്തി. പത്തനംതിട്ട ജില്ലാ വ്യവസായ ഓഫീസിലെ ഡെപ്യൂട്ടി രജിസ്ട്രാർ അഞ്ചൽ വടമൺ കൃഷ്ണവിലാസത്തിൽ ബി.രതീശൻ പിള്ളയുടെ (56) മൃതദേഹമാണ് കണ്ടെത്തിയത്.

ശനിയാഴ്ച ഉച്ചയ്ക്ക് 2ന് കാൽ നനയ്ക്കാൻ കല്ലടയാറ്റിലേക്കിറങ്ങവേ രതീശൻ പിള്ള വെള്ളത്തിലേക്ക് വീഴുകയായിരുന്നു. തുടർന്ന് സമീപവാസികൾ അറിയിച്ചതിനെ തുടർന്ന് പുനലൂരിൽ നിന്ന് എത്തിയ അഗ്നിരക്ഷാസേന ശനിയാഴ്ച തെരച്ചിൽ നടത്തിയെങ്കിലും കണ്ടെത്താനായില്ല. പിന്നീട് അഗ്നിരക്ഷാസേനയുടെ കൊല്ലം കടപ്പാക്കടയിൽ നിന്നുള്ള സ്‌കൂബാ സംഘം കൂടിയെത്തി തെരച്ചിൽ നടത്തിയെങ്കിലും ഫലമുണ്ടായില്ല. തുടർന്ന് കഴിഞ്ഞ ദിവസം രാവിലെ മുതൽ തെരച്ചിൽ പുനരാരംഭിച്ചെങ്കിലും മഴ ശക്തമായതിനെ തുടർന്ന് തെന്മല ഡാമിന്റെ ഷട്ടറുകൾ തുറന്നുവിട്ടതിനാൽ കല്ലടയാറ്റിൽ ജലനിരപ്പും ഒഴുക്കും കൂടിയത് തെരച്ചിൽ ദുഷ്‌കരമാക്കി.

ഇന്നലെ തെരച്ചിൽ വീണ്ടും പുനരാംഭിക്കുന്നതിനിടെയാണ് എലിക്കാട്ടൂർ പാലത്തിന് സമീപം മൃതദേഹം കണ്ടെത്തിയത്. മൃതദേഹം പാരിപ്പള്ളി മെഡിക്കൽ കോളേജിലെ പോസ്റ്റ്മോർട്ടത്തിന് ശേഷം വീട്ടുവളപ്പിൽ സംസ്‌കരിച്ചു. സഹകരണ വകുപ്പിൽ ഇൻസ്പെക്ടറായ ഷിലാനിയാണ് ഭാര്യ. ബി.എഡ് വിദ്യാർത്ഥികളായ വിഷ്ണു, ജിഷ്ണു എന്നിവരാണ് മക്കൾ.