കൊല്ലം: ഭാര്യയും മൂന്ന് ആൺ​മക്കളും ചേർന്ന് വീട്ടി​ൽ നി​ന്ന് ഇറക്കി​വി​ട്ടതോടെ സ്വന്തം ഓട്ടോറി​ക്ഷ വീടാക്കി​ താമസി​ച്ചി​രുന്ന, ക്യാൻസർ രോഗിയായ ശ്രീകുമാറി​ന് (59) ആശ്രയമേകി​ വവ്വാക്കാവിലെ കണ്ണകി ശാന്തിതീരം അഗതി മന്ദിരം.

തിരുമുല്ലവാരം മനയിൽകുളങ്ങര സ്വദേശിയായ ശ്രീകുമാ‌റിനെ മൂന്ന് വർഷം മുമ്പാണ് ഭാര്യയും മക്കളും പുറന്തള്ളി​യത്. ഭാര്യയുടെ പേരിലായിരുന്നു വീട്. കുടുംബപ്രശ്നങ്ങൾ പെരുകി​യപ്പോൾ ശ്രീകുമാർ വീടി​ന് പുറത്തായി​. ഇതോടെ അന്തി​യുറങ്ങാൻ ഓട്ടോറി​ക്ഷയായി​ ആശ്രയം. മുളങ്കാടകത്തും തിരുമുല്ലവാരത്തും അടക്കം പലഭാഗത്തായി ഓട്ടോറിക്ഷ ഒതുക്കി ടാർപോളിൻ കൊണ്ട് മൂടി അതിൽതന്നെ കിടക്കുകയായിരുന്നു പതിവ്. വലിയ മഴയോ മറ്റോ ഉള്ള സമയത്ത് പരിചയക്കാരുടെ വീടുകളിലും ചിലപ്പോൾ കടത്തിണ്ണകളി​ലും കി​ടക്കും. സുഹൃത്തുക്കളാണ് ആഹാരം നൽകിയിരുന്നത്. ഇതി​നി​ടെ ആറുമാസം മുമ്പ് ശ്രീകുമാറിന് വായിൽ ക്യാൻസർ സ്ഥിരീകരിച്ചു. തുടർന്ന് നാട്ടുകാരുടെ സഹായത്തോടെ തിരുവനന്തപുരം ആർ.സി.സിയിലെത്തി​ മരുന്നു വാങ്ങി​. പക്ഷേ ഇടയ്ക്ക് മരുന്ന് മുടങ്ങി. ദിവസം കഴിയുന്തോറും ആരോഗ്യസ്ഥിതി മോശമായി. ആഹാരം കഴിക്കാനാവാത്ത അവസ്ഥ. ഓട്ടോറി​ക്ഷ ഒന്നനക്കി​യി​ട്ട് മൂന്നു മാസത്തി​ലേറെയായി​. ഇതോടെ മുളങ്കാടകം ഗവ.വനിത ഐ.ടി.ഐക്ക് സമീപം ഇടവഴിയിൽ വണ്ടി​ ഒതുക്കി അതി​ൽത്തന്നെ താമസം തുടങ്ങി​.

ഏക സഹോദരൻ തനിക്കാവുന്നതു പോലെ സഹായിച്ചെങ്കിലും വീട്ടിലേക്ക് കൂട്ടിക്കൊണ്ടുപോവാൻ കഴി​യാത്ത അവസ്ഥയായി​രുന്നു. ശ്രീകുമാറിന്റെ ദയനീയാവസ്ഥ സഹോദരൻ ജീവകാരുണ്യ പ്രവർത്തകരെ അറിയിച്ചു. തുടർന്ന് ശക്തികുളങ്ങര ഗണേഷ്, ഡിവിഷൻ കൗൺസിലർ യു.പവിത്ര എന്നിവർ ചേർന്ന് ഇന്നലെ ശ്രീകുമാറിനെ അഗതിമന്ദിരത്തിൽ എത്തിച്ചു. കണ്ണകി ശാന്തിതീരം ട്രസ്റ്റ് ഉടമ ജയശ്രീ അമ്പാടി, മാനേജിംഗ് ഡയറക്ടർ ഉണ്ണി എന്നിവർ ചേർന്ന് സ്വീകരി​ച്ചു. ശ്രീകുമാറി​ന് തുടർചികിത്സ ഉറപ്പുവരുത്തുമെന്ന് ജയശ്രീ അമ്പാടി പറഞ്ഞു.