കരുനാഗപ്പള്ളി : ഇരുചക്രവാഹന മോഷ്ടാവ് പൊലീസ് പിടിയിലായി. കരുനാഗപ്പള്ളി അയണിവേൽക്കുളങ്ങരയിൽ അരണശ്ശേരി പടിഞ്ഞാറ്റതിൽ സനൽകുമാർ(34) ആണ് കരുനാഗപ്പള്ളി പൊലീസിന്റെ പിടിയിലായത്. കഴിഞ്ഞ ചൊവ്വാഴ്ച രാത്രി 10.30 മണിയോടെ കരുനാഗപ്പള്ളി വിജയ ഹോട്ടലിന് സമീപത്ത് നിന്ന് കൊല്ലക സ്വദേശിയുടെ ബൈക്കാണ് മോഷണം നടത്തിയത്. വാഹന ഉടമയുടെ പരാതിയുടെ അടിസ്ഥാനത്തിൽ പൊലീസ് നിരവധി സി.സി.ടി.വി ദൃശ്യങ്ങൾ പരിശോധിച്ച് നടത്തിയ അന്വേഷണത്തിലാണ് മോഷ്ടാവിനെ തിരിച്ചറിഞ്ഞത്. സനൽകുമാറിനെ മോഷണത്തിന് സഹായിച്ചയാളെയും പൊലീസ് തിരിച്ചറിഞ്ഞിട്ടുണ്ട്. ഇയാളെ ഉടൻ പിടികൂടുമെന്ന് കരുനാഗപ്പള്ളി പൊലീസ് അറിയിച്ചു. സനൽകുമാർ സൈക്കിൾ മോഷണത്തിന് മുമ്പ് പൊലീസ് പിടിയിലായി റിമാൻഡിൽ കഴിഞ്ഞിട്ടുണ്ട്. കരുനാഗപ്പള്ളി പൊലീസ് ഇൻസ്‌​പെക്ടർ ബിജുവിന്റെ നേതൃത്വത്തിൽ എസ്.ഐ മാരായ ഷെമീർ, കണ്ണൻ, ഷാജിമോൻ, ജോയി സി.പി.ഒമാരായ ഹാഷിം , നൗഫൽജാൻ എന്നിവർ ചേർന്നാണ് പ്രതിയെ പിടികൂടിയത്.